SMTI rahbari Bishkekdagi forumda Xitoy va Markaziy Osiyo savdosini baholadi

Aripovning maʼlumotlariga koʻra, 2025-yilda Xitoyning Markaziy Osiyo mamlakatlari bilan savdosi ilk bor 106 mlrd dollardan oshdi va bir yil ichida 12% ga oʻsdi. Uning soʻzlariga koʻra, Xitoy mintaqadagi besh davlatning har biri uchun yetakchi savdo hamkori boʻlib qolmoqda. Besh yil ichida Oʻzbekiston va Xitoy oʻrtasidagi savdo hajmi uch baravar oshib, 18 mlrd dollarga yaqinlashdi, Xitoy investitsiyalari esa besh baravar koʻpayib, 17 mlrd dollarga yetdi.

Shu bilan birga, SMTI rahbari hali barcha maqsadlarga erishilmaganini taʼkidladi: savdo tuzilmasi hozircha tomonlarning manfaatlari va imkoniyatlariga toʻliq mos kelmayapti. Shu munosabat bilan u transport tarmoqlarining, jumladan, «Xitoy — Qirgʻiziston — Oʻzbekiston» temir yoʻli qurilishining ahamiyatini koʻrsatib oʻtdi hamda yangi yoʻnalishlar nafaqat tranzit uchun xizmat qilishi, balki iqtisodiy koridorlarga aylanishi muhimligini taʼkidladi. Aripov alohida tarzda sanoat va raqamli hamkorlik, birinchi navbatda, standartlar, qoʻshma loyihalarga yondashuvlar va xavfsizlik protokollarini muvofiqlashtirish haqida soʻz yuritdi.

Uning fikricha, sheriklikning hozirgi bosqichida hajmlar oʻsishidan sifatga, tovar savdosidan — ishlab chiqarish kooperatsiyasiga, loyihalar almashinuvidan — boshqaruv tajribasi almashinuviga oʻtish zarur. SMTI direktori modernizatsiya begona modellardan nusxa koʻchirmasdan, tomonlar bir-birining tajribasini oʻzlashtirgan taqdirdagina samara beradi, deb hisoblaydi. Forumning bu yilgi mavzusi — «Yuqori sifatli rivojlanish va birgalikdagi modernizatsiya».