Transport vazirligi va Fransiya delegatsiyasi shahar transporti hamda Yangi Toshkentni muhokama qildi

Uchrashuvda Fransiyaning Alstom, IVECO va Dassault Systèmes kompaniyalari vakillari ham ishtirok etdi. Tomonlar Oʻzbekistonda transportni rivojlantirishning ustuvor yoʻnalishlari, xususan, shahar transporti hamda shahar ichidagi va tashqarisidagi hududlarni bogʻlovchi multimodal yechimlar haqida soʻz yuritdilar.

Mahalliy operatorlar va texnik mutaxassislarning turli shahar transport turlariga uzoq yillar davomida xizmat koʻrsatishi va ulardan foydalana olishi uchun ularni oʻqitish masalasi alohida muhokama qilindi. Poyezdlar, metro, avtomobillar va boshqa transport turlarini birlashtiruvchi multimodal tizimni yaratish haqida ham soʻz bordi. Jerar Volf Yangi Toshkent transport tizimini shakllantirishda dekarbonizatsiya, samaradorlik va multimodalilikni hisobga olish muhimligini taʼkidladi.

Fransiya tomoni Dassault Systèmes kompaniyasining Oʻzbekiston bilan logistika xablarining raqamli egizaklari va transport tarmoqlarini rejalashtirish boʻyicha hamkorligini yoʻlga qoʻyishni taklif qildi. Bundan tashqari, Transport vazirligi delegatsiyasining Fransiyaga amaliy tashrifini tashkil etish taklif etildi: dasturda vazirlik Fransiyadagi eng yirik deb atagan Paris-Saclay ilmiy-texnologik va innovatsion klasteri, shuningdek, shahar transportini boshqarish boʻyicha Fransiya tajribasi bilan tanishish koʻzda tutilgan.

Oʻsha kuni Iqtisodiyot va moliya vazirligi ham Fransiya delegatsiyasi bilan energetika, suv taʼminoti, transport va kommunal infratuzilma sohalaridagi qoʻshma loyihalar muhokama qilingan muzokaralar haqida xabar berdi.