Oʻzbekistonliklar uchun Misrga kirish qoidalarining qatʼiylashtirilishi 2027-yil martigacha qoldirildi

Koʻrsatilgan sanagacha Oʻzbekiston fuqarolari Misrga amaldagi qoidalar boʻyicha borishlari mumkin. TIV maʼlumotlariga koʻra, avvalgi qarorning qayta koʻrib chiqilishiga vazirlik va Oʻzbekistonning Misrdagi elchixonasi tomonidan Misr tomoni bilan olib borilgan toʻgʻridan-toʻgʻri muzokaralar natijasida erishildi.

Kechiktirilgan tartibda vizani oldindan Misrning diplomatik vakolatxonalarida olish va sayyohlik safarlarini faqat vakolatli turoperatorlar orqali amalga oshirish koʻzda tutilgan edi. 40 yoshdan kichik boʻlgan sayyohlarga kirishga faqat yaqin qarindoshlari — ota-onasi, turmush oʻrtogʻi yoki farzandlari bilan birgalikda ruxsat berilar, bunda oilada kamida 5000 dollar naqd pul boʻlishi kerak edi. 40 yoshdan oshgan va yolgʻiz ketayotganlar uchun yonida 3000 dollardan boshlab mablagʻ boʻlishi talab qilinardi. Chegarada mehmonxona band qilinganligini, mobil aloqa maʼlumotlarini va mablagʻ mavjudligini tasdiqlovchi hujjatlarni koʻrsatish kerak boʻlar, toʻliq hujjatlar toʻplamisiz esa sayyohni kiritmasliklari va oʻsha aviakompaniyaning reysi bilan orqaga qaytarib yuborishlari mumkin edi. Misrda boʻlib turgan holda sayyohlik vizasini boshqa turdagi vizaga almashtirishning imkoni boʻlmasdi. Gazeta.uz maʼlumotlariga koʻra, oldindan viza olish, jumladan, Sharm-al-Shayx va Sinay yarim orolining boshqa hududlariga safarlar uchun ham talab qilinardi.

Vazirlik xorijiy hamkorlar bilan vizasiz rejimlar va safarlarni soddalashtirish boʻyicha ishlarni davom ettirayotganini qoʻshimcha qildi. TIV, shuningdek, chet elga chiqayotgan fuqarolarni boshqa davlatlarning qonunlari hamda viza qoidalariga rioya qilishga va ularning urf-odatlarini hurmat qilishga chaqirdi.