Ispaniyada ikkita tezyurar poyezd toʻqnashib ketdi, kamida 68 kishi halok boʻldi

Toʻqnashuv mahalliy vaqt bilan soat 08:54 atrofida Madrid — Sevilya yuqori tezlikdagi liniyasining Los-Yebenes va Urda shaharlari oraligʻidagi uchastkasida sodir boʻlgan. Renfe poyezdida 397 nafar, Iryo tarkibida esa 147 nafar yoʻlovchi boʻlgan. Kamida ikkita vagon relsdan chiqib ketgan va koʻtarmadan qulagan. Yaralanganlar soniga hozircha aniqlik kiritilmoqda: El País 58 nafar jabrlanuvchi haqida (ularning 15 nafari ogʻir ahvolda) xabar bergan boʻlsa, El Español gazetasi fuqaro muhofazasi xizmatiga tayanib, kamida 179 nafar kishi haqida maʼlumot bergan.

El Paísʼning hukumatdagi suhbatdoshlari avariya sababi sifatida dastlab «inson omili xatosi»ni koʻrsatmoqda. Ularning taxminiga koʻra, sakkiztaga yaqin poyezdning toʻxtab qolishiga sabab boʻlgan xavfsizlik tizimidagi nosozlikdan soʻng, Madridning Atocha vokzalida harakatni boshqarayotgan dispetcher ushbu uchastka Iryo poyezdi tomonidan band boʻlishiga qaramay, xatolik tufayli Renfe tarkibiga yoʻlni davom ettirishga ruxsat bergan. Tergovning rasmiy xulosalari hozircha eʼlon qilinmadi.

Infrastruktura operatori Adif Madridni Andalusiya va Syudad-Real bilan bogʻlovchi magistraldagi harakatni toʻxtatdi hamda yoʻlovchilardan qatnovlar qayta tiklanmaguncha vokzallarga kelmaslikni soʻradi. Renfe bekor qilingan reyslar chiptalarini almashtirish yoki qaytarishni taklif qilmoqda, yoʻlovchilarning qarindoshlari uchun 900 10 10 20 ishonch telefoni hamda Atocha vokzali va Sevilyada qoʻllab-quvvatlash markazlari ishlab turibdi. Kastiliya — La-Mancha mintaqasi hukumati favqulodda vaziyatlarga javob berish rejasini amaliyotga kiritdi.

Ispaniya bosh vaziri Pedro Sanches Xʼda fojiadan «chuqur larzaga kelgani»ni yozdi. Oʻzbekiston Prezidenti Shavkat Mirziyoyev Ispaniya Qiroli Filipp VI ga hamdardlik bildirdi, ispan xalqiga hamda halok boʻlganlarning oilalariga dalda soʻzlarini yoʻlladi va jabrlanganlarning tez fursatda sogʻayib ketishini tiladi.