Oʻnlab delegatlar Netanyaxuning nutqi paytida BMT Bosh Assambleyasi zalini tark etdi

Isroil bosh vazirining 24-sentabrdagi chiqishi qoʻllab-quvvatlovchi va norozilik hayqiriqlari bilan kechdi, shu sababli majlis raisi ishtirokchilarni tartibga chaqirishga majbur boʻldi. Ushbu demarshga javoban Netanyaxu chiqib ketgan vakillarni «maʼnaviy qoʻrqoqlar» deb taʼrifladi va Isroilning Gʻazo sektorida genotsid sodir etganlikda ayblanishini «asrning eng katta yolgʻoni» deb atadi.

Oʻz murojaatida bosh vazir Gʻazo sektori, Eron va Yaqin Sharqning boshqa mintaqalaridagi harbiy operatsiyalarni himoya qilib, jangovar harakatlarni davom ettirish niyatida ekanini bildirdi. U shuningdek, AQSH prezidenti Donald Trampga Eronga qarshi birgalikdagi qadamlar uchun minnatdorlik bildirib, Isroilni qoralayotgan davlatlarni tanqid qildi.

Oʻsha kuni Bosh Assambleya oldida AQSH ketma-ket ikkinchi yil viza berishni rad etayotgan Falastin milliy maʼmuriyati rahbari Mahmud Abbos videoaloqa orqali nutq soʻzladi. Abbos Isroil hukumatini buzgʻunchi siyosat olib borishda, Gʻarbiy sohilda aholi punktlarini kengaytirishda va Gʻazo sektori aholisiga qarshi harbiy harakatlarda ayblab, jahon hamjamiyatini qatʼiy choralar koʻrishga chaqirdi.

Netanyaxuning nutqi Nyu-Yorkda koʻcha namoyishlarini ham keltirib chiqardi. The New York Times maʼlumotiga tayanib Podrobno.uz xabar berishicha, namoyishlarda 1250 dan ortiq odam qatnashgan, ularning 100 ga yaqini Manxetten politsiyasi tomonidan qoʻlga olingan.