Qirgʻiziston prezidenti Andijonda bosh konsulxona ochish toʻgʻrisidagi farmonni imzoladi

Yangi vakolatxonaning konsullik okrugiga Oʻzbekistonning uchta viloyati: Andijon, Fargʻona va Namangan viloyatlari kiradi. Farmon 373-raqamga ega.

Hujjat matniga koʻra, bosh konsulxona Qirgʻiziston fuqarolarining huquqlari hamda qonuniy manfaatlarini himoya qilish va ularga konsullik xizmatlarini koʻrsatish maqsadida tashkil etilmoqda. Shuningdek, ikki davlat oʻrtasidagi iqtisodiy va madaniy hamkorlikni kengaytirish hamda qulay sharoitlar yaratish ham vazifalar qatorida keltirilgan.

Qirgʻiziston Vazirlar Mahkamasiga vakolatxonani ochish bilan bogʻliq tashkiliy va moliyaviy masalalarni hal etish hamda normativ-huquqiy hujjatlarni mazkur farmonga muvofiqlashtirish topshirildi. Hujjat rasmiy eʼlon qilinganidan keyin oʻn kun oʻtib kuchga kiradi; Podrobno.uz maʼlumotlariga koʻra, bu 20-noyabrga toʻgʻri keladi.

Japarov Andijonda bosh konsulxona ochish niyatini 2026-yil iyul oyida, Oʻzbekiston prezidenti Shavkat Mirziyoyev davlat tashrifi bilan Qirgʻizistonda boʻlganida eʼlon qilgan edi. Qirgʻiziston rahbarining soʻzlariga koʻra, bunday qaror fuqarolarning borib-kelishi, savdo, turizm, madaniy-gumanitar aloqalar va chegaraoldi hududlarini rivojlantirish uchun yanada qulay sharoitlarni taʼminlaydi.