Qozogʻiston dastlabki oʻtkazish punktlarida kirish uchun elektron ruxsatnomalarni joriy qildi

Birinchi bosqichda tizim Aqtau xalqaro aeroportida, shuningdek, Pavlodar viloyatidagi Rossiya bilan chegarada joylashgan «Urlyutobe», Jambul viloyatidagi «Auxatti», Turkiston viloyatidagi «Atameken» va Jetisuv viloyatidagi «Nurli Jol» avtomobil oʻtkazish punktlarida ishga tushdi. 2027-yil 1-yanvardan u Ostona va Olmaota aeroportlariga, 2027-yil 1-martdan esa davlat chegarasidagi barcha boshqa oʻtkazish punktlariga tatbiq etiladi.

2027-yil 30-iyungacha oʻtish davri amal qiladi: ruxsatnomasiz ham kirish mumkin, biroq chegarada chet elliklarga uni rasmiylashtirish zarurligi haqida ogohlantirish beriladi. 2027-yil 1-iyuldan boshlab ETA majburiy boʻladi, u mavjud boʻlmagan taqdirda esa kirish rad etilishi mumkin. Podrobno.uz taʼkidlashicha, ruxsatnomaning mavjudligi kirishni kafolatlamaydi: chegarachilar qonunda koʻzda tutilgan asoslarga koʻra kirishni rad etish huquqiga ega.

Rasmiylashtirish bepul boʻlib, QazETA raqamli platformasi orqali amalga oshiriladi, arizani kirishdan kamida 72 soat oldin topshirish lozim. Amal qilish muddati olti oydan kam boʻlmagan xorijga chiqish pasporti, elektron pochta va safar maqsadini koʻrsatish talab qilinadi. Ruxsatnoma milliy xavfsizlik organlari bilan kelishilgan holda ichki ishlar organlari tomonidan beriladi va u 180 taqvim kuni davomida amal qiladi. Bunda boʻlish muddatini Qozogʻistonning migratsiya qoidalari belgilaydi; Oʻzbekiston fuqarolariga u yerda vizasiz 90 kungacha boʻlishga ruxsat berilgan.

Talab faqat Qozogʻistonga vizasiz kirish huquqiga ega mamlakatlar fuqarolariga taalluqlidir. Undan 29 ta toifa, jumladan 16 yoshgacha boʻlgan bolalar, 65 yosh va undan katta shaxslar, diplomatlar, amaldagi Qozogʻiston vizasi yoki yashash guvohnomasiga ega boʻlganlar, shuningdek, aeroportning tranzit zonasini tark etmaydigan tranzit yoʻlovchilar ozod qilingan.