Bryusselda Markaziy Osiyo va YI tahliliy markazlarining birinchi forumi boʻlib oʻtdi

«Markaziy Osiyo – YI: oʻzgarayotgan dunyoda hamkorlik transformatsiyasi» nomli forum uchta tashkilotchi tomonidan tayyorlandi: Oʻzbekiston Prezidenti huzuridagi SMII, Yevropa Ittifoqining Markaziy Osiyo boʻyicha Maxsus vakili idorasi hamda Yevropa xavfsizlik tadqiqotlari instituti (EUISS). OʻzA maʼlumotlariga koʻra, ushbu uchrashuv 2025-yil aprel oyida Samarqandda boʻlib oʻtgan va mintaqalar oʻrtasidagi munosabatlar strategik sheriklik maqomini olgan «Markaziy Osiyo – Yevropa Ittifoqi» sammitining davomi boʻldi. Sammitda tahliliy markazlarning oʻzaro hamkorligini kengaytirishni Shavkat Mirziyoyev taklif qilgan edi.

Aripov Markaziy Osiyo iqtisodiyoti yiliga 6% dan koʻproqqa oʻsayotgani, uning aholisi esa 2050-yilga borib 100 million kishidan oshishi mumkinligi haqidagi baholarni keltirib oʻtdi. «Biz uchun Yevropa Ittifoqi bilan sheriklik — bu boshqa hamkorlar bilan hamkorlik erkinligini saqlab qolgan holda iqtisodiy aloqalarni kengaytirish, bozorlarni diversifikatsiya qilish va yangi texnologiyalarni jalb qilish imkoniyatidir», — dedi u.

SMII direktori istiqbolli yoʻnalishlar qatorida oʻta muhim minerallar boʻyicha qoʻshma ishlab chiqarish zanjirlarini, jumladan ularni qayta ishlash va yuqori qoʻshilgan qiymatga ega mahsulotlar ishlab chiqarishni, suv va iqlim barqarorligini hamda transport aloqalarini, shu jumladan Transkaspiy xalqaro transport yoʻnalishini sanab oʻtdi. U, shuningdek, kasbiy taʼlim, raqamli koʻnikmalar, qonuniy mehnat harakatchanligi va Afgʻonistondagi barqarorlikka koʻmaklashish haqida ham gapirdi.

Aripov siyosiy kelishuvlarni aniq loyihalarga aylantirishni asosiy vazifa deb hisoblaydi. Forum ishtirokchilari ushbu maydonchani doimiy qilishdan manfaatdor ekanliklarini bildirdilar.