Toshkent kengashi metro uchun 14 ta poyezd xarid qilish loyihasini maʼqulladi

Xarid qilish zarurati bir necha oʻn yillardan buyon foydalanilayotgan eski vagonlarning bir qismi oʻz resursini oʻtab boʻlgani, shuningdek, yillik yoʻlovchi oqimi 2022-yildagi 136,7 million kishidan 2025-yilda 287 million kishiga yetishi bilan izohlanmoqda. Olti vagonli poyezdlar varianti rad etildi, chunki ular eng qisqa bekat platformalariga sigʻmaydi va bekatlarni rekonstruksiya qilishni talab etgan boʻlardi.

Hujjatda yettita mamlakat: Xitoy, Rossiya, Fransiya, Ispaniya, Chexiya, Janubiy Koreya va Yaponiya ishlab chiqaruvchilarining takliflari taqqoslandi. Yetkazib berish bilan birga eng past narxni Xitoyning CRRC kompaniyasi ($118,3 mln), eng yuqori narxni esa Yaponiyaning Kawasaki kompaniyasi ($279,1 mln) koʻrsatdi. Rasmiy tijorat takliflarini CRRC va Rossiyaning «Globalniye transportniye resheniya» kompaniyasi yubordi, Siemens esa soʻralgan xususiyatlarga ega poyezdlarni yetkazib berish imkoni yoʻqligini maʼlum qildi. Qolgan variantlar ochiq manbalar asosida baholandi.

Yetkazib beruvchi hali belgilanmagan. Agar Rossiyadan boshqa ishlab chiqaruvchi gʻolib boʻlsa, xizmat koʻrsatish uchun maydon, loyihalash va ishlarni tashkil etish xarajatlarisiz dastlabki qiymati $10,13 millionga baholangan alohida depo va servis bazasi qurish kerak boʻladi. Xaridni davlat budjetidan qoplanadigan kreditlar hisobidan moliyalashtirish, yetkazib berishni esa 2027-yil 1-noyabrgacha uchta partiyada amalga oshirish rejalashtirilmoqda.