Google TPU 8tx va TPU 8i Max SI-tizimlarini taqdim etdi

TPU 8i Max bitta modulda ikkita TPU 8i chipidan yigʻilgan. Google maʼlumotlariga koʻra, odatiy TPU 8i bilan taqqoslaganda yangi mahsulot ikki baravar koʻproq hisoblash quvvati va SRAM xotirasiga ega, HBM oʻtkazuvchanligi ham ikki baravar yuqori. Avvalgi oʻlchamlari saqlab qolingan holda unda kremniy miqdori ikki baravar koʻp boʻlib, kompaniya soʻzlariga koʻra, bu maʼlumotlar markazining birlik maydon va vatt hisobidagi quvvatini oshiradi.

TPU 8tx davlat tashkilotlari hamda qatʼiy tartibga solinadigan sohalardagi kompaniyalarga moʻljallangan. Unda TPU 8t beshinchi avlod AMD EPYC protsessorlari bilan birga ishlaydi, maʼlumotlar va model vaznlari esa apparat vositasida hamda qayta ishlash jarayonida himoyalangan. Google tizimdagi kechikish TPU 8tʼga qaraganda ikki baravargacha pastroq ekanini maʼlum qilmoqda. Unda modellarni klasterlar oʻrtasida koʻchirmasdan, yopiq maʼlumotlar asosida qoʻshimcha oʻqitish mumkin.

Kompaniya, shuningdek, tezlatgichlar uchun dasturiy vositalarni, jumladan, Agent Compute Engine, TPU Sync va ochiq XLA Serving Engine dvigatelini namoyish etdi. Google maʼlumotlariga koʻra, Gemini yordamida chiplar komponentlarini joylashtirish sxemalari endilikda haftalab emas, bir necha soat ichida yaratilmoqda.

TPU 8t va TPU 8i tizimlarini kompaniya aprel oyida Google Cloud Next konferensiyasida namoyish etgan edi. Googleʼning SI va infratuzilma boʻyicha bosh texnologi Amin Vadaat, iXBT yozishicha, TPU ekotizimi mijozlari sonini maʼlum qildi: ular deyarli 100 tani tashkil etadi. Yangi tizimlarni yetkazib berish muddatlari va narxlari oshkor qilinmagan.