Amazon tarkibidagi Ring uy uchun dron-kamera va patrulchi robotni taqdim etdi

Ushbu ikki qurilma bilan yangi Ring Robotics liniyasi boshlanadi. Ularning harakatlanishi uchun AI Pilot tizimi javob beradi. U kameralardan olinadigan tasvir va datchiklar maʼlumotlari asosida bino rejasini tuzadi hamda aylanib chiqish uchun nuqtalarni, masalan, derazalar yoki kassa zonasini taklif etadi. Soʻngra tizim toʻsiqlarni aylanib oʻtib yoki aylanib uchib, yoʻnalish hosil qiladi. Hisob-kitoblarning bir qismi bulutda bajariladi.

Dronning vazni 165 gramm boʻlib, u 148° koʻrish burchagi bilan 2K formatida video tasvirga oladi hamda bitta quvvatda havoda 8 daqiqagacha tura oladi. Qorongʻida tasvirga olish uchun yorugʻlik-diodli (LED) yoritgich mavjud. Aylanib uchish jadval boʻyicha, ilovadagi buyruq orqali yoki Ring datchiklari signali bilan ishga tushadi, qolgan vaqtda esa dron quvvatlash stansiyasida turadi. Agar aloqa uzilsa, u oʻzi yerga qoʻnadi. Qoʻlda boshqarish koʻzda tutilmagan.

Roverda esa 4K kamerasi suriluvchi machtaga oʻrnatilgan boʻlib, u rastalar va peshtaxtalar ustidan qarash imkonini beradi. Bundan tashqari, u sirena, yorugʻlik mayogʻi va ikki tomonlama audioaloqa bilan jihozlangan. Bitta quvvat 30 daqiqalik patrullashga yetadi, qamrab olinadigan maydon 465 m² ni tashkil etadi. Har ikkala qurilmadan olingan videoyozuvlar Throw Away the Key (TAKE) shifrlash tizimi bilan himoyalangan.

AQSHda Ring Rover Cam savdolari 2026-yil 16-dekabr kuni boshlanadi, narxi — $999,99. Ring Drone Cam dronini xaridorlarga joʻnatish 2027-yil 27-yanvar kuni boshlanadi, uning narxi $249,99 boʻladi. Ring asoschisi Jeymi Siminoff maqsad «shunchaki koʻproq kamera qoʻshish emas, balki xavfsizlik qurilmasi tushunchasining oʻzini qayta koʻrib chiqish» boʻlganini tushuntirdi.