Paintʼdagi zaiflikni tuzatish Windows 11ʼli kompyuterlarning bir qismiga yetib bormayapti

Xatolik haqidagi maʼlumotlarni kompaniya 13-oktabr kuni har oylik tuzatishlar toʻplami doirasida eʼlon qildi. CVSS shkalasi boʻyicha zaiflik 10 balldan 8,1 ball oldi, Microsoftʼning oʻz tasnifiga koʻra esa «muhim» toifasiga kiritildi, bu oʻta xavfli darajadan bir pogʻona pastdir. Gap ajratilgan xotira sohasi chegarasidan tashqaridagi maʼlumotlarni oʻqish (out-of-bounds read) haqida bormoqda. Microsoft tavsifiga koʻra, hujum tarmoq orqali, avtorizatsiyasiz va foydalanuvchi tomonidan hech qanday harakatsiz amalga oshiriladi: zaif xizmatga maxsus tuzilgan tarmoq paketini yuborish kifoya. Shu bilan birga, kompaniya hujumning murakkabligini yuqori deb baholamoqda, maʼlumot oshkor qilingan paytda undan foydalanish holatlari qayd etilmagan edi.

Paint yangilanishlarni Windows Updateʼdan mustaqil ravishda Microsoft Store orqali oladi, shuning uchun tizim uchun oktabr oyidagi jamlanma toʻplam muharrirdagi zaiflikni bartaraf etmaydi. Microsoft ayni paytda 11.2609.401.0 talqinini tuzatilgan deb atamoqda. Kod.ru maʼlumotlariga koʻra, dastlab byulletenda 11.2605.91.0 raqami koʻrsatilgan edi, u 2-noyabr kuni almashtirildi.

Foydalanuvchilarning soʻzlariga koʻra, doʻkon qoʻlda tekshirilganda va avtomatik yangilanish yoqilgan boʻlsa ham yangi talqinni topmayapti hamda Paint 11.2603.251.0 yoki 11.2605.81.0 yigʻilmalarida qolmoqda. 3DNews nashrining Windows Latestʼga tayanib xabar berishicha, toʻplamni MSIX uchun moʻljallangan uchinchi tomon vositalari yordamida ham yuklab olishning imkoni boʻlmadi. Sabablari nomaʼlum, Microsoft vaziyatga rasman izoh bermadi.

Oʻrnatilgan yigʻilma raqami Paintʼning oʻz sozlamalarida koʻrsatilgan, uni PowerShellʼdagi Get-AppxPackage komandleti orqali ham olish mumkin. Microsoft hujjatlariga koʻra, raqami 11.2609.401.0 dan past boʻlgan yigʻilmalar zaif hisoblanadi.