BYD Yangwang U9 elektrokarining tezligi Abu-Dabida 503,17 km/soatga yetdi

iXBT.com maʼlumotlariga koʻra, mazkur natijani Xalqaro avtomobil federatsiyasi (FIA) va Ginnesning rekordlar kitobi tasdiqladi. Xabr yozishicha, U9 Xtreme rasman 500 km/soatlik marrani zabt etgan ilk seriyali avtomobil boʻldi. Ushbu modelning oldingi koʻrsatkichi 496,22 km/soatni tashkil etgan edi, yangisi esa undan 6,95 km/soatga yuqori.

Oldingi sinovlar yopiq poligonlarda oʻtkazilgan boʻlsa, bu poyga umumiy foydalanishdagi yoʻllarda tashkil etildi. Mashina jazirama issiq, yonlama shamol va choʻl changiga dosh berishiga toʻgʻri keldi.

Giperkar 1200 voltli elektr arxitekturasi va har biri daqiqasiga 30 000 aylanishgacha tezlashishga qodir toʻrtta elektromotordan foydalanadi. Ularning umumiy quvvati 2220 kVt yoki 2977 ot kuchiga teng (iXBT.com maʼlumotiga koʻra — 3000 ot kuchidan ziyod). Shinalar, tormozlar, sovutish tizimi va kuzovni boshqarish tizimlari ekstremal tezliklarga moslashtirilgan. Tashqi tomondan Xtreme versiyasi uglerod-plastik old splitter, orqa diffuzor, ikkita havo oʻtkazgichga ega kapot hamda «oqqush boʻyni» turidagi mahkamlagichlarga oʻrnatilgan baland orqa qanot (antrqanot) bilan ajralib turadi.

U9 Xtreme ishlab chiqarilishi cheklangan boʻladi: BYD bunday avtomobillardan koʻpi bilan 30 dona ishlab chiqarilishini tasdiqladi.