Tesla 2027-yil oʻrtalariga kelib Texasda Cybertruck ishlab chiqarishni toʻxtatishni rejalashtirmoqda

Mask pikap ishlab chiqarish boshqa korxonaga koʻchirilishi yoki butunlay toʻxtatilishi haqida aniqlik kiritmadi. Ostindagi gigafabrika — ushbu modelning maxsus qismlarini tayyorlash uchun jihozlangan Teslaʼning yagona maʼlum zavodidir. Izohlarga bergan javoblarida Mask Cybertruckʼni Tesla tarixidagi eng yaxshi avtomobil, uning ishlab chiqarilishi toʻxtatilishini esa «davrning intihosi» deb atadi. Pikapning yetakchi muhandisi Ues Morrill model «Cybercab tufayli yashashda davom etishini» yozdi.

Sotuvlar boshida Mask har yili 250 mingta pikap sotish rejalari haqida gapirgan edi. Spot.uzʼning Reuters va Kelley Blue Book platformasiga tayanib xabar berishicha, talab eng yuqori boʻlgan 2024-yilda 38 965 ta, 2025-yilda esa 20 237 ta mashina sotilgan. Maskga tegishli boʻlgan va $131 millionlik pikap buyurtma qilgan SpaceX eng yirik xaridorlardan biriga aylandi. Tesla Cybertruck sotuvlarini alohida eʼlon qilmaydi: model «Boshqa modellar» toifasiga kiradi, unga 2026-yilning uchinchi choragida deyarli 8,3 mingta yetkazib berish toʻgʻri kelgan, ikkinchi chorakda esa ularning soni 12 mingdan ortiq edi.

AQSh regulyatorlarining maʼlumotlariga koʻra, uch yil ichida Cybertruck 11 marta chaqirib olingan. Nostandart dizayni va piyodalar uchun xavflari sababli modelning Yevropa bozoriga chiqishida qiyinchiliklar yuzaga keldi. Mask Cybercabʼni Tesla robotaksi tarmogʻi uchun asosiy avtonom model sifatida koʻrmoqda. Sentabr oyida kompaniya Ostinda Cybercabʼning kichik parkida pulli safarlarni boshladi, ammo u AQSh avtomobil xavfsizligi agentligining ushbu mashinani sertifikatlash boʻyicha savollariga hali javob berishi kerak.