Bükiluvchan iPhone Duo xaridorlari ekranning bukilish chizigʻi boʻylab yoriqlar paydo boʻlayotganidan shikoyat qilmoqda

Avstraliyalik xaridor Reddit platformasida ekran xarid qilinganidan keyin olti soatdan kamroq vaqt oʻtib yorilib ketgani haqida gapirib berdi. Bu vaqt ichida u qurilmani 20 martadan kamroq ochgan. Uning soʻzlariga koʻra, ochish paytida sharnir yonida gʻayritabiiy narsani his qilgan, soʻngra qirsillagan tovush eshitilgan va ekran aynan bukilish joyidan shikastlangan. Koʻrinib turgan zarba izlari yoki ichkariga tushgan begona jism boʻlmagan. Apple qoʻllab-quvvatlash xizmati unga ekspress-almashtirishni taklif qilgan, biroq buning uchun bank kartasida telefonning toʻliq narxini band qilib qoʻyish talab etilgan, yetkazib berish muddatlari esa kafolatlanmagan. Eng yaqin Apple Store doʻkonida esa undan uzr soʻrab, darhol yangi apparat berishgan.

Kod.ru xabariga koʻra, boshqa bir egasi bir necha marta ochganidan soʻng sharnir qattiqlashib qolganini, keyin esa tarsillagan tovush chiqib, ichki ekran yorilganini payqagan. Smartfon oʻsha kuniyoq Apple Store doʻkonida bepul almashtirib berilgan. Shuningdek, xarid qilinganidan taxminan ikki yarim soat oʻtgach, mexanizmning gʻirchillashi va lyufti yuzasidan ham shikoyatlar mavjud.

Muammo qanchalik keng tarqalgani hozircha nomaʼlum. Kod.ru nashrining MacRumorsʼga tayanib xabar berishicha, eʼlon qilingan shikastlanishlarning aksariyati bukilish sohasiga toʻgʻri keladi, biroq suratlarning bir qismi kelib chiqishi nomaʼlum boʻlgan namoyish qurilmalaridan olingan. Koʻp marta bukish boʻyicha oʻtkazilgan baʼzi dastlabki sinovlar nosozliklarni aniqlamagan. Gap alohida nusxalarning nuqsonida emas, balki sharnir konstruksiyasida ekanligi haqida tasdiqlar yoʻq. Apple ushbu shikoyatlarga ommaviy tarzda izoh bermadi.