Fransiyadagi yuzlab supermarketlarning muzlatkichlari kiberhujumga uchradi

Xakerlar Daniyaning Danfoss kompaniyasi uskunalarining sozlamalarini masofadan oʻzgartirib, qurilmalarni haroratni 50 °C gacha koʻtargan holda olti soatgacha boʻlgan muddatga muzdan tushirish rejimiga oʻtkazgan. Bu mahsulotlarning buzilishiga olib keldi, natijada savdo tarmoqlari ularni utilizatsiya qilishga majbur boʻldi, shuningdek, mahalliy yongʻinlar kelib chiqdi.

Butun mamlakat boʻylab bir qancha yirik chakana savdo tarmoqlarining doʻkonlari zarar koʻrdi. Intermarché tarmogʻi egasi — Les Mousquetaires kompaniyasi — taxminan 150 ta doʻkonda nosozlik yuz berganini maʼlum qildi (France24 telekanali 200 tagacha boʻlgan bahoni keltirgan). Coopérative U tarmogʻida 100 ga yaqin savdo nuqtasi zararlangan, Carrefour riteyleri esa taxminan 6 mingta doʻkondan 80 tasiga hujum uyushtirilgani haqida xabar berdi. Parij prokuraturasi hodisa koʻlamini, kiberhujumning oziq-ovqat yoʻqotishlari va yongʻin oʻchoqlari bilan bogʻliqligini tekshirmoqda.

Fransiyaning CERT-FR javob qaytarish markazi Danfoss kompaniyasining AK-SM va AK-SC seriyali kontrollerlari buzib kirilgani haqida ogohlantirish berib, boshqaruv interfeysini internetga ochiq qoldirish mumkin emasligini koʻrsatib oʻtdi. Ishlab chiqaruvchi Danfoss zarar koʻrgan tizimlarda eskirgan dasturiy taʼminot oʻrnatilganini maʼlum qildi. Fransiya bosh vaziri Sebastyan Lekornyuning topshirigʻiga binoan tergovga ANSSI agentligi ham qoʻshildi va u yevropalik hamkorlar bilan harakatlarni muvofiqlashtirmoqda.