Google oʻzining flagman Gemini 4 Argon AI-modeliga kirish imkoniyatini ochdi

Model Google AI Pro va Ultra obunalariga ega foydalanuvchilar uchun Gemini ilovasida hamda qidiruv tizimining sunʼiy intellekt rejimida, shuningdek, dasturchilar uchun Gemini API, Antigravity va boshqa rasmiy servislar orqali taqdim etildi. 3DNews nashrining 9to5Google maʼlumotlariga tayanib xabar berishicha, Argon modelidan Google Antigravity alohida ilovasida, uning konsol versiyasida, shuningdek, Google AI Studio va Android Studio Canary yigʻilishida foydalanish uchun Ultra darajasidagi obuna talab qilinadi.

Neyrotarmoq dasturlash, kiberxavfsizlik, fan, moliya va yurisprudensiya sohalaridagi vazifalarni hal etish uchun moʻljallangan. API orqali 1 milliontagacha token qoʻllab-quvvatlanadi (Xabr maʼlumotlariga koʻra, bu kirish va chiqish uchun yagona umumiy limitdir). Google bayonotiga koʻra, Argon kasbiy vazifalar boʻyicha Vals Index indeksida 68,9%, Harvey's Legal Agent Benchmark testida 19,6% va fazoviy fikrlash boʻyicha ERQA testida 87% natija koʻrsatdi.

30-noyabrgacha API orqali kirish narxi 1 million kiruvchi token uchun 2 dollar va 1 million chiquvchi token uchun 10 dollarni tashkil etadi. 1-dekabrdan boshlab narxlar mos ravishda 4 va 20 dollargacha koʻtariladi. Keshlangan kiruvchi maʼlumotlar uchun 95% chegirma amal qiladi.