Galaxy S24 Janubiy Koreyadan tashqarida ham One UI 9 yangilanishini ola boshladi

Dasturiy taʼminot Indoneziya va Tailanddagi Galaxy S24, S24+ va S24 Ultra foydalanuvchilari oʻrtasida tarqatila boshlandi. Avvalroq interfeysning barqaror talqini Janubiy Koreyadagi ushbu 2024-yilgi flagmanlarda paydo boʻlgan, Galaxy S26’da esa sentabr oyida taqdim etilgan edi.

Yangilanishda nisbatan yangi qurilmalarda taqdim etilgan funksiyalar paydo boʻldi. My FanCam vositasi video yozib olingandan soʻng tanlangan shaxsni avtomatik ravishda kadr markazida ushlab turish imkonini beradi. Now Nudge yordamchisi yozishmalarni tahlil qilib, manzilni saqlashni yoki boshqa ilovaga oʻtmasdan maʼlumotlarni ochishni taklif qiladi, Call Brief esa boʻlib oʻtgan telefon suhbatining qisqacha mazmunini shakllantiradi. Now Brief qisqacha axborotida koʻrsatiladigan kartochkalarni qoʻlda sozlash imkoni yaratildi.

Bundan tashqari, dasturchilar tezkor sozlamalar panelini qayta ishlab chiqib, ovoz balandligi, yorqinlik va pleyer regulyatorlarining oʻlchamini oʻzgartirish, shuningdek, tugmalar oʻrnini almashtirish imkonini berdilar. Oʻzgarishlar koʻp vazifalilik rejimi hamda tashqi monitorga ulanganda ishlaydigan Samsung DeX rejimiga ham daxldor boʻldi.