Fransiyadagi yuzlab supermarketlar muzlatkichlarga qaratilgan kiberhujumga uchradi

Hujumchilar Daniyaning Danfoss kompaniyasiga tegishli uskunalar sozlamalarini masofadan oʻzgartirib, qurilmalarni olti soatgacha boʻlgan muddatga haroratni 50 °C gacha koʻtaradigan muzdan tushirish rejimiga oʻtkazgan. Bu mahsulotlarning buzilishiga olib keldi va savdo tarmoqlari ularni utilizatsiya qilishga majbur boʻldi, shuningdek, mahalliy yongʻinlar kelib chiqdi.

Butun mamlakat boʻylab bir nechta yirik chakana savdo tarmoqlarining doʻkonlari zarar koʻrdi. Intermarché tarmogʻi egasi — Les Mousquetaires kompaniyasi taxminan 150 ta doʻkonda nosozlik yuz berganini maʼlum qildi (France24 telekanali 200 tagacha deb baholagan). Coopérative U tarmogʻida 100 ga yaqin savdo nuqtasi zararlangan, Carrefour riteyleri esa qariyb 6 mingta doʻkondan 80 tasiga hujum qilingani haqida xabar berdi. Parij prokuraturasi hodisa koʻlamini, kiberhujumning oziq-ovqat yoʻqotishlari va yongʻin oʻchoqlari bilan bogʻliqligini tekshirmoqda.

Fransiyaning CERT-FR javob choralari markazi Danfoss kompaniyasining AK-SM va AK-SC seriyali kontrollerlari buzilgani haqida ogohlantirish berib, boshqaruv interfeysini internetga ochiq qoldirish mumkin emasligini koʻrsatib oʻtdi. Ishlab chiqaruvchi Danfoss zararlangan tizimlarda eskirgan dasturiy taʼminot oʻrnatilgan boʻlganini bildirdi. Fransiya bosh vaziri Sebastyan Lekornyu topshirigʻiga koʻra tergovga ANSSI agentligi ham qoʻshildi, u yevropalik hamkorlar bilan harakatlarni muvofiqlashtirmoqda.