2026-yilning III choragida jahon boʻyicha smartfonlar yetkazib berish 20 foizga pasaydi

Tahlilchilar pasayishning asosiy omili sifatida DRAM va NAND xotiralari, shuningdek, boshqa butlovchi qismlarning qimmatlashishini qayd etishdi. Xomashyo tannarxining oshishi va yetkazib berishdagi tanqislik ishlab chiqaruvchilarning joʻnatish jadvallarida uzilishlarga olib keldi. Counterpoint Research maʼlumotlariga koʻra, ishlab chiqaruvchilar oshgan xarajatlarni xaridorlar zimmasiga yukladi: dunyo boʻyicha smartfonlarning chakana narxlari 2026-yil boshidan buyon 20 foizga koʻtarildi.

Jahon bozoridagi yetakchilikni Samsung kompaniyasi saqlab qoldi. Uning yetkazib berish hajmi yillik hisobda 3 foizga kamaydi, biroq bozordagi ulushi 23 foizgacha oshdi. Ikkinchi oʻrinni 22 foizlik ulush bilan Apple egalladi, bu kompaniya uchun uchinchi chorakdagi rekord koʻrsatkich boʻldi. Ikki yetakchi oʻrtasidagi farq bir foiz punktigacha qisqardi.

Xiaomi yetkazib berish hajmi chorak davomida 30 foizdan ortiqqa pasaydi, uning ulushi esa 10 foizgacha tushdi. Oppo va Vivo joʻnatmalari 20 foizdan ziyodroqqa kamayib, mos ravishda bozorning 9 va 8 foizini egalladi. Tahlilchilarning baholashicha, butlovchi qismlarning qimmatligi va xarid qobiliyatining pasayishi sababli 2026-yil oxirigacha yetkazib berish hajmining sezilarli darajada tiklanishini kutish kerak emas.