Uzum Market faoliyatida texnik nosozlik yuz berdi

Kompaniya maʼlumotlariga koʻra, nosozliklar sotuvlar mavsumi boshlanishi arafasida tunda oʻtkazilgan tizimlarni rejali yangilash jarayonida yuzaga kelgan. Natijada bir qator xizmatlar, jumladan sotuvchilarning shaxsiy kabinetlari, omborlar va buyurtmalarni topshirish punktlari uchun moʻljallangan platforma vaqtincha ishlamay qoldi. Platforma foydalanuvchilari sayt va ilovani ochishda xatoliklarga, shuningdek profilga kirish va xaridlarni rasmiylashtirishda qiyinchiliklarga duch keldilar.

Ushbu hodisa tufayli marketpleys omborlarda va topshirish punktlarida tovarlarni qabul qilishni, shuningdek qaytarilgan tovarlarni berishni vaqtincha toʻxtatdi. Uzum Market buyurtmalarni topshirish punktlarida joʻnatmalarni saqlash muddatlari uzaytirilganini, sotuvchilarga esa yetkazib berish vaqt oraliqlarini (taymslotlarni) jarima sanksiyalarisiz koʻchirishga ruxsat berilganini maʼlum qildi. Kompaniya tiklash ishlarini kun davomida yakunlashni rejalashtirmoqda.

Servis matbuot xizmati Spot soʻroviga javoban platforma maʼlumotlarining bir qismi ekotizimning shaxsiy infratuzilmasida, bir qismi esa Oʻzbekiston hududidagi bulutli serverlarda joylashtirilganini aniqlashtirdi. Uzum Bank vakillari bank xizmatlari odatiy rejimda ishlayotgani va marketpleysdagi nosozliklar ularga taʼsir qilmaganini maʼlum qildilar.