ChatGPT kodida oyiga $500 turadigan yangi Pro Max tarifi belgilari aniqlandi

Xizmatning veb-interfeysi ochiq boʻlmagan kodidagi yangi tarif rejasi izlarini 24-sentabr kuni muhandis Tibor Blaxo payqab qoldi. Dasturchi Deyan Velimirovich esa tariflarni tanlash sahifasida obuna kartochkasini chiqarishga muvaffaq boʻldi: uning bazaviy narxi oyiga 500 dollar, yevropalik foydalanuvchilar uchun qoʻshilgan qiymat soligʻini hisobga olgan holda 515 yevro etib koʻrsatilgan.

Aniqlangan tavsifga koʻra, Pro Max tarifi hisoblash hamda uzoq davom etadigan vazifalar uchun Work va Codex vositalarining maksimal ishlash tezligini, flagman modellarga kirish huquqini, kengaytirilgan kontekstli xotira hajmini, fayllar uchun 100 GB bulutli xotirani va platformaning yangi imkoniyatlaridan muddatidan oldin foydalanishni oʻz ichiga oladi. OpenAI kompaniyasi bunday tarif joriy etilgani haqida rasman hozircha e’lon qilmadi, uning obunalar roʻyxatida ushbu tarif mavjud emas.

ChatGPT Pro’ning amaldagi tarif rejasi oyiga 200 dollar turadi. Obuna haqidagi batafsil ma’lumotlar 29-sentabrga rejalashtirilgan OpenAI DevDay konferensiyasida taqdim etilishi mumkinligi taxmin qilinmoqda.