Futbol boʻyicha 2027-yilgi Osiyo kubogi dekabr oyiga koʻchirildi

Avvalroq musobaqalarni 2027-yil 7-yanvardan 5-fevralgacha oʻtkazish rejalashtirilgan edi, shu tariqa ularning boshlanishi qariyb bir yilga surilmoqda. OFKning maʼlum qilishicha, qaror tashkiliy qoʻmita va Saudiya Arabistoni futbol federatsiyasi bilan maslahatlashuvlardan soʻng qabul qilingan. Konfederatsiya va tashkilotchilar bunga sabab qilib «mintaqadagi favqulodda vaziyat, jiddiy logistika qiyinchiliklari va transport qatnovidagi uzilishlar»ni koʻrsatdi.

Saudiya Arabistoni turnirni qabul qilish huquqini oʻzida saqlab qoladi. Tashkiliy qoʻmita muddat koʻchirilishini allaqachon maʼqullagan, biroq yangi sanalarni hali FIFA tasdiqlashi kerak. Shaharlar va stadionlar oʻzgarishi borasida hozircha hech narsa xabar qilinmagan.

Turnirda oltita guruhga boʻlingan 24 ta terma jamoa ishtirok etadi. Fabio Kannavaro boshchiligidagi Oʻzbekiston jamoasi Iordaniya, KXDR va Bahrayn bilan birga B guruhidan joy oldi. Kun.uz keltirgan yangilangan jadvalga koʻra, 2027-yil 24-dekabr kuni oʻzbekistonliklar Jiddada Iordaniya bilan, 28-dekabrda Ar-Riyodda KXDR bilan, 2028-yil 2-yanvarda esa yana Jiddada Bahrayn bilan oʻynaydi.

Upl.uz yozishicha, avvalroq Kannavaroning terma jamoa bilan shartnomasi 2027-yil oktabr oyigacha moʻljallangani haqida maʼlumot paydo boʻlgan edi. Nashrning baholashicha, italiyalik mutaxassis turnirda jamoaga rahbarlik qilishi uchun kelishuvni uzaytirishga toʻgʻri keladi.