Toshkentda «Zakovat-Gambit» shaxmat turniri gʻoliblari taqdirlandi

Final partiyalari poytaxtda 29–30-oktabr kunlari oʻtkazildi. Ishtirokchilar reytingi va tayyorgarlik darajasi hisobga olingan holda beshta guruhga boʻlindi. Har bir guruh gʻolibiga 50 mln soʻm, ikkinchi oʻrin uchun 30 mln soʻm, uchinchi oʻrin uchun 20 mln soʻm beriladi. Guruhning eng yaxshi ayol shaxmatchisi 20 mln soʻmlik alohida sovrinni qoʻlga kiritadi. Umumiy mukofot jamgʻarmasi 620 mln soʻmni tashkil etdi.

Bu yil turnirda qatnashish uchun 5831 nafar shaxmatchi roʻyxatdan oʻtdi, ulardan 633 nafari ayollar va qizlar boʻlib, bu musobaqalar tarixidagi rekord koʻrsatkichdir. Ishtirokchilar soni bir yil oldingiga nisbatan qariyb ikki baravar koʻpaydi. Mintaqaviy saralash ilk bor mamlakatning barcha 14 ta hududida anʼanaviy tarzda oʻtkazildi; shuningdek, saralashdan Chess.com platformasida onlayn tarzda oʻtish ham mumkin edi.

Saida Mirziyoyeva turnirga qiziqishning ortishini yoshlarning bilimga intilishi bilan bogʻladi. U mamlakat xalqaro shaxmatda sezilarli yutuqlarga erishganini, biroq har kim oʻz qobiliyatini namoyon eta oladigan sharoitlarni yaratish ham xuddi shunday muhimligini taʼkidladi. Bunda u «Zakovat» loyihasiga alohida oʻrin ajratdi: «Mamlakat kelajagi yosh avlodning faqat nimalarni bilishiga emas, balki qanday fikrlashiga ham bogʻliq».