«Paxtakor» OFK Elita Chempionlar ligasida «Al-Nasr»ga 2:6 hisobida imkoniyatni boy berdi

Hisobni 15-daqiqada Abdulloh Al-Hamdan ochdi, Joau Felish esa ikki bor — 17 va 32-daqiqalarda gol urdi. Mezbonlar safida 36-daqiqada Flamarion oʻz hisobiga gol yozdirib qoʻydi. Tanaffusdan soʻng «Al-Nasr» tarkibida Abdulloh Al-Amriy (53-daqiqa), Abdulrahmon Gʻarib (62) va Anjelo (79) gollarni kiritdi, toshkentliklarning ikkinchi toʻpini esa 75-daqiqada zaxiradan maydonga tushgan Dostonbek Hamdamov kiritdi. Uchrashuvni avstraliyalik hakam Aleksander King boshqarib bordi, «Paxtakor» futbolchilari Muhammadbobur Karimov (32) va Sherzod Nasrullayev (57) ogohlantirish oldi.

Ronalduning Toshkentda oʻynamasligi haqida bir kun oldin Oʻzbekiston futbol assotsiatsiyasi maʼlum qilgan edi. Upl.uz maʼlumotlariga koʻra, saudiyaliklar bosh murabbiyi Ange Postekoglu Kingsli Koman hamda himoyachi Moxamed Simakanni ham safarga olib bormagan. Shunga qaramay, toʻlib-toshgan tribunalardagi tomoshabinlar Sadio Mane, Joau Felish, Samuel Koshta va Inigo Martinesni maydonda koʻrish imkoniga ega boʻldi.

Ushbu magʻlubiyatdan soʻng moldovalik murabbiy Emilian Karas jamoasi 2 ochko bilan turnir jadvalining 12-pogʻonasida bormoqda. «Al-Nasr» 6 ochko toʻplab, 4-oʻringa koʻtarildi. Turnir doirasidagi navbatdagi oʻyinini Oʻzbekiston vitse-chempioni 23-noyabr kuni safarda boshqa bir Saudiya klubi — «Al-Ittihod»ga qarshi oʻtkazadi.