Oʻzbekistonda shaxmatchilarga jahon turnirlari medallari uchun mukofotlar oshirildi

Hujjatga koʻra, kattalar oʻrtasidagi Butunjahon shaxmat olimpiadasi va paralimpiadasidagi oltin medal uchun sportchilar 200 ming dollar, murabbiylar esa 50 ming dollar oladi. Kumush medal uchun toʻlov mos ravishda 100 ming va 25 ming dollarni, bronza medali uchun 50 ming va 12,5 ming dollarni tashkil etadi. Ilgari bu summalar bazaviy hisoblash miqdorlarida hisoblangan: birinchi oʻrin uchun sportchiga 2000 BHM, ikkinchi oʻrin uchun — 1000 BHM, uchinchi oʻrin uchun — 500 BHM toʻlangan.

Yoshlar oʻrtasidagi Butunjahon shaxmat olimpiadasi va paralimpiadasi uchun ilk bor alohida mukofotlar joriy etildi: oltin uchun 20 ming dollar, kumush uchun 10 ming va bronza uchun 5 ming dollar (ustozlarga — mos ravishda 5 ming, 2,5 ming va 1,25 ming dollar).

FIDE tasnifidagi jahon miqyosidagi musobaqalarda gʻoliblarga 15 ming dollar, kumush medal egalariga — 7,5 ming, bronza sovrindorlariga — 3,75 ming dollar tayinlandi (murabbiylarga — 7 ming, 3,5 ming va 1,75 ming). FIDEning Osiyo miqyosidagi turnirlarida shaxmatchilar oltin uchun 10 ming, kumush uchun 5 ming va bronza uchun 2,5 ming dollar oladi (murabbiylar — 5 ming, 2,5 ming va 1,25 ming). Xalqaro grossmeyster sport unvoni berilganligi uchun shaxmatchilarga avvalgi 100 BHM oʻrniga 5 ming dollar miqdorida bir martalik toʻlov belgilandi.

Murabbiylarga mukofot sportchini oxirgi bir yil davomida tayyorlagan mutaxassislarga beriladi. Bir nechta ustoz ishtirok etgan taqdirda, summa murabbiylar kengashi qaroriga binoan taqsimlanadi.