Timur Turlov Samarqanddagi Bosh assambleyada FIDE prezidenti etib saylandi

Saylovlar 26-sentabr kuni 46-Butunjahon shaxmat olimpiadasi doirasida yashirin ovoz berish yoʻli bilan oʻtkazildi. Ikkinchi turda Turlov 110 ta ovoz toʻplab, 85 nafar delegat ovoz bergan Vadim Rozenshteynni ortda qoldirdi. Birinchi turda Turlov 96 ta ovoz, Rozenshteyn 76 ta ovoz, Germaniyadan nomzod Yan Xenrik Byuttner esa 20 ta ovoz oldi. Birinchi bosqichda jami 196 ta byulleten topshirildi (Anhor.uz nashri maʼlumotlariga koʻra — 192 ta), ulardan toʻrttasi haqiqiy emas deb topildi.

Yagona prezidentlik roʻyxati boʻyicha 38 yoshli Turlov bilan birga jahon chempioni Vishvanatan Anand FIDE prezidenti oʻrinbosari lavozimini egalladi. Anhor.uz’ning Reuters’ga tayanib xabar berishicha, Turlov toʻrt yillik muddatga saylandi va xalqaro federatsiyaning sakkizinchi prezidenti, shuningdek, tashkilot boshidagi Qozogʻiston va Markaziy Osiyoning birinchi vakili boʻldi.

FIDE rahbari lavozimida Turlov 2018-yildan beri federatsiyani boshqarib kelgan Arkadiy Dvorkovichning oʻrnini egalladi. 2026-yil iyul oyida Dvorkovich Yevropa Ittifoqining sanksiyalar roʻyxatiga kiritilgani sababli oʻz vazifalarini bajarishni ixtiyoriy ravishda toʻxtatgan edi, shundan soʻng tuzilmani vaqtincha Anand boshqargan.