Oʻzbekiston oʻsmirlar Olimpiadasida yengil atletika boʻyicha ikkita kumush medalni qoʻlga kiritdi

Xolmurodov finalda 15,71 metr natija koʻrsatib, oʻzining shaxsiy rekordini yangiladi. Oltin medal 16,18 metr natija bilan xitoylik Shen Syuefenga nasib etdi, bronza medalini esa portugaliyalik Juan Matush (15,53 m) qoʻlga kiritdi, deb yozadi Podrobno.uz.

Bir kun avval nayza uloqtirish boʻyicha Parizoda Talabova ikkinchi oʻrinni egallagan edi. Uning 54,68 metrga uloqtirgan natijasi faoliyatidagi eng yaxshisi boʻldi: u avvalgi shaxsiy rekordidan 98 sm oʻzib ketdi. Faqat kolumbiyalik Ilsa Kordoba (57,62 m) undan yuqori natija koʻrsatdi, uchinchi oʻrinni latviyalik Eliza Ligere (52 m) egalladi. Podrobno.uz maʼlumotlariga koʻra, bu Oʻzbekistonning oʻsmirlar Olimpiadalarida yengil atletika boʻyicha tarixidagi ilk medallaridir: Talabova qizlar orasida, Xolmurodov esa oʻgʻil bolalar orasida ushbu sport turida shohsupaga koʻtarilgan birinchi sportchilar boʻldi.

OʻzA maʼlumotlariga koʻra, terma jamoa jamgʻarmasida toʻrtta kumush va bitta bronza medali bor. 200 metrga brass usulida suzish boʻyicha bronza medalini avvalroq suzuvchi Muhammadismoil Rahmonov qoʻlga kiritgan edi — bu mamlakatning oʻsmirlar Olimpiya oʻyinlarida suzish boʻyicha birinchi medalidir.

Senegal poytaxtidagi IV yozgi oʻsmirlar Olimpiya oʻyinlari 31-oktabrdan 13-noyabrgacha davom etadi. Oʻzbekiston 11 ta sport turi boʻyicha 19 nafar sportchini maydonga tushirdi.