2027-yil 1-yanvardan bir qator kompaniyalar uchun importda QQS ortiqcha toʻlovini hisobga olish avtomatik boʻladi

Hujjat Iqtisodiyot va moliya vazirligi hamda Soliq qoʻmitasi tomonidan birgalikda tasdiqlangan. Adliya vazirligi uni 2026-yil 31-oktabrda 3966-raqam bilan roʻyxatdan oʻtkazdi, matn Lex.uz saytiga joylashtirilgan. Hisobga olish uchun soliq va bojxona organlari oʻrtasida maʼlumotlar almashinuvi yoʻlga qoʻyiladi.

Oʻzaro hisobga olish huquqidan toʻrt toifadagi korxonalar foydalanishi mumkin: Yirik soliq toʻlovchilar boʻyicha hududlararo inspeksiya xizmat koʻrsatadigan kompaniyalar; oʻz mahsulotlari uchun xomashyo va butlovchi buyumlar import qiluvchi elektrotexnika ishlab chiqaruvchilari; xavf darajasi past boʻlgan QQS toʻlovchisi hisoblangan tashqi iqtisodiy faoliyat ishtirokchilari; davlat sektori bundan mustasno, barqarorlik reytingi BBB va undan yuqori boʻlgan korxonalar.

Hisobga olish toʻgʻrisida bildirish uchun import qiluvchi bojxona yuk deklaratsiyasining 47-grafasidagi TU ustuniga VZ kodini kiritadi. Bojxona qoʻmitasi ortiqcha toʻlov mavjudligini tasdiqlash uchun Soliq qoʻmitasiga elektron soʻrov yuboradi. Agar u tasdiqlansa, oʻzaro hisobga olish dalolatnomasi avtomatik tarzda shakllanadi, bojxona esa summani soliq toʻlovchining shaxsiy hisobvaragʻida aks ettiradi va deklaratsiyani rasmiylashtiradi. Adliya vazirligida taʼkidlanishicha, barcha jarayonlar avtomatlashtirilgan, tartib esa import vaqtida tadbirkorlar uchun qulayliklar yaratadi.

Cheklovlar ham mavjud: soliq toʻlovchiga nisbatan soliq tekshiruvi oʻtkazilayotgan davrda hisobga olish amalga oshirilmaydi. Agar korxonaning soliq qarzi, shu jumladan kechiktirilgan qarzi boʻlsa, hisobga olishdan keyingi qoldiq ushbu qarz summasidan kam boʻlishi mumkin emas.