Binance ehtimoliy xakerlik hujumini tekshirmoqda: 2,54 milliard dollar muzlatildi

Birja bayonotida aytilishicha, xavfsizlik jamoasi mavjud maʼlumotlarni oʻrganmoqda: «Ushbu bosqichda biz foydalanuvchilar mablagʻlariga biron-bir taʼsir koʻrsatilganini tasdiqlamadik». Mijozlardan rasmiy boʻlmagan havolalarni ochmaslik va notanish shaxslarga hisob qaydnomasi maʼlumotlarini bermaslik soʻraldi. Tekshiruv vaqtida Binance mablagʻ kiritish va yechib olishni, shuningdek, Binance Alpha platformasidagi savdoni toʻxtatdi. Birja hammuassisi I Xe kompaniya xakerlik hujumidan koʻrilgan barcha zararni qoplab berishini bildirdi.

Binanceʼni boshqarmayotgan, biroq uning eng yirik aksiyadori boʻlib qolayotgan Chjao aksiyador sifatida foydalanuvchilar mablagʻlari toʻliq qoplanishini kutayotganini yozdi. Uning soʻzlariga koʻra, Tether qariyb 971 million dollarni, Circle qariyb 823 million dollarni bloklagan. Kursiv keltirgan Reuters maʼlumotlariga koʻra, Tetherʼga deyarli 1,57 milliard dollar, Circleʼga 800 million dollardan ortiq toʻgʻri kelgan, yana 200 million dollarga yaqin mablagʻni Ripple bloklagan.

3DNews blokcheyn maʼlumotlariga tayanib yozishicha, 29-oktabr kuni Moskva vaqti bilan soat 23:24 da «Binance 14» hamyoni yangi manzilga 167 500 ga yaqin ETH, 1,615 milliard USDT va yana 60 dan ortiq turdagi aktivlarni — jami taxminan 2,5 milliard dollarlik mablagʻni joʻnatgan. Oradan 17 daqiqa oʻtib, xuddi shu manzilga 780 million USDC kelib tushgan. Yetkazilgan zarar miqdori rasman belgilanmagan: The Block maʼlumotlariga koʻra, shubhali manzillardan biriga qariyb 3,55 milliard dollar kelib tushgan, Coinbase vakili Konor Grogan esa olib chiqib ketilgan ehtimoliy hajmni 5,8 milliard dollarga baholagan.

Shu fonda bitkoin 79 ming dollardan pastga tushdi: Kursiv tayanayotgan Associated Press maʼlumotlariga koʻra — 3,2 foizga, Bloombergʼga asoslangan 3DNews maʼlumotlariga koʻra — 3,7 foizga.