Markaziy bank Open Bankʼka Oʻzbekistonda ilk bor islomiy banking litsenziyasini berdi

Markaziy bank boshqaruvining 2026-yil 23-oktabrdagi 28/1-sonli qarori bunga asos boʻldi. Litsenziya «Banklar va bank faoliyati toʻgʻrisida»gi qonunning 5-1-moddasida koʻrsatilgan operatsiyalarni amalga oshirishga ruxsat beradi. Bular — mudaraba (foydani taqsimlagan holda moliyalashtirish va omonatlar), vakala (agentlik shartnomasi asosida), murabaha (mijozga tovarlarni muddatli toʻlov evaziga sotish), salam (tovar uchun oldindan toʻlov), musharaka (sheriklik yoki ustav kapitalida ishtirok etish) va ijara (keyinchalik sotib olish huquqi bilan islomiy ijara) hisoblanadi. Qonun xalqaro amaliyotga mos keladigan va qonunchilikka zid boʻlmagan boshqa islomiy operatsiyalarni ham amalga oshirishga ruxsat beradi.

Open Bank allaqachon tijorat banki sifatida faoliyat yuritmoqda: u 2025-yil sentabrida oʻz nomini Smart Bankʼdan oʻzgartirgan edi. Gazeta.uzʼning korporativ maʼlumotlarni oshkor qilish tizimiga tayanib yozishicha, aksiyadorlar 2026-yil 29-iyunda islomiy bankingni yoʻlga qoʻyishni maʼqullagan hamda bankda Islomiy moliya kengashini tuzishga qaror qilgan.

Islomiy bankingni joriy etish toʻgʻrisidagi qonunni Prezident 2026-yil 27-martda imzolagan, u 29-iyundan kuchga kirgan edi. Mart oyida davlat rahbari huzurida oʻtkazilgan yigʻilishda tijorat bankida kamida bitta «islomiy darcha» ochish, 2026–2030-yillarda esa ikkita toʻlaqonli islomiy bank tashkil etish rejalari haqida soʻz borgan edi. Bu orqali 1 milliard dollarga yaqin investitsiya va depozitlar jalb etilishi kutilmoqda.

Markaziy bank fuqarolarni bank xizmatlaridan foydalanishdan oldin regulyatorning rasmiy veb-sayti orqali unda litsenziya bor-yoʻqligini tekshirishga chaqirdi.