Oʻzbekiston Markaziy banki 1 mln soʻmlik banknot chiqarilishini rad etdi

Yangi kupyura haqidagi xabarlar ijtimoiy tarmoqlarda rad etilishidan bir necha kun oldin paydo boʻldi. Spot.uz yozishicha, ularga Oʻzbekistonning birinchi prezidenti Islom Karimov surati tushirilgan soxta banknot dizayni ilova qilingan. Markaziy bank bu maʼlumotni «asossiz, yolgʻon va feyk» deb atadi hamda ishonchli axborotni bankning rasmiy sahifalaridan olishga chaqirdi.

«Markaziy bank toʻgʻrisida»gi qonunga koʻra, pul belgilarining nominal qiymatini regulyator belgilaydi (39-modda). Shuningdek, u qonuniy toʻlov vositasi sifatida banknotlar va tangalarni muomalaga chiqarish boʻyicha mutlaq huquqqa ega (40-modda). Yangi pullarning namunalari va dizaynini Markaziy bank Oliy Majlis Senati Kengashi bilan kelishilgan holda tasdiqlaydi, ularning tavsifi hamda chiqarilishi toʻgʻrisidagi maʼlumotlarni esa OAVda oldindan eʼlon qiladi.

Hozirgi kunda mamlakatdagi eng yirik kupyura — 200 ming soʻm. Uning dizaynini Markaziy bank 2022-yil 13-iyulda, banknot muomalaga chiqarilishidan ikki kun oldin taqdim etgan edi. May oyida regulyator 500 ming soʻmlik banknot chiqarish rejalari haqidagi mish-mishlarni ham rad etgan edi.