Oʻzbekiston Markaziy banki «tartibga solish qumdoni»ni uchta yoʻnalishga ajratdi

Yangi tahrir 2022-yil oktabrdagi nizom oʻrnini bosadi va Lex.uz saytida eʼlon qilingan. Yoʻnalishlar «innovatsiyalar», «akseleratsiya» va «texnologik hamkorlik» deb ataladi. Birinchisi bozor uchun yangi yoki anʼanaviy boʻlmagan yondashuvlarga asoslangan xizmatlar uchun, ikkinchisi Oʻzbekistonda hali mavjud boʻlmagan, ammo boshqa mamlakatlarda sinovdan oʻtgan xizmatlar uchun, uchinchisi esa banklar va boshqa tashkilotlarning texnik yechimlari uchun moʻljallangan. Akseleratsiyadagi sinovlar olti oygacha uzaytirish imkoniyati bilan 12 oygacha, qolgan yoʻnalishlarda esa uch yilgacha davom etadi.

Ishtirokchilar doirasi kengaytirildi: norezidentlar hammuallif-arizachi sifatida qatnasha oladi, shuningdek, MB emas, balki boshqa davlat organlari tomonidan tartibga solinadigan kompaniyalarga ham ishtirok etishga ruxsat beriladi. Ariza topshirishdan oldin dastlabki maslahat olish mumkin: MB soʻrovdan soʻng besh ish kuni ichida uni tashkil etish choralarini koʻradi. Arizalar elektron platforma orqali qabul qilinadi, koʻrib chiqish uchun avvalgidek 40 ish kuni ajratiladi, MB qaror haqida uch kun oʻrniga bir ish kuni ichida xabar beradi.

Sinovdan oʻtayotgan xizmatlar reklamasida ularning test rejimida taqdim etilayotgani aniq koʻrsatilishi kerak. Agar kompaniyada maʼlumotlarni himoya qilish boʻyicha texnik imkoniyatlar boʻlmasa, regulyator ruxsat berishni rad etishi mumkin. Agar loyiha ishga tushirilgandan soʻng yarim yil davomida faoliyat yuritmasa, shuningdek, maxfiy maʼlumotlarning sizib chiqishi yoki yoʻqolishi bilan bogʻliq kiberxavfsizlik hodisasidan keyin ishtirokchini chiqarib yuborish mumkin.