Oʻzbekistonda «Fidoyi volontyor» koʻkrak nishoni taʼsis etildi

Farmonga muvofiq, koʻngillilar ham moddiy, ham maʼnaviy jihatdan ragʻbatlantiriladi. Rasmiylar ularning ishtirokida ijtimoiy ahamiyatga ega tadbirlar, loyihalar va aksiyalar tashkil etishi, shuningdek, huquq va erkinliklariga rioya etilishini kuzatib borishi lozim. Volontyorlikni «Ezgulik sari qadam» shiori ostida umummilliy harakat sifatida rivojlantirish rejalashtirilmoqda. Hujjatning maqsadlari sifatida yolgʻiz keksalar, nogironligi boʻlgan shaxslar va boshqa ijtimoiy himoyaga muhtoj fuqarolarni begʻaraz qoʻllab-quvvatlash, shuningdek, xayriya ekologik tadbirlari qayd etilgan.

2027-yildan boshlab davlat OTMlari talabalari va texnikumlar oʻquvchilari «Kasbiy volontyorlik» dasturida ishtirok etishi mumkin boʻladi. Ishtirok etish ixtiyoriy boʻlib, darsdan tashqari vaqtda va oʻz mutaxassisligi boʻyicha volontyorlik guruhlarida faoliyat yuritiladi. Aholi, eng avvalo, yoshlar va davlat xizmatchilari uchun oʻsha yildan eʼtiboran Service Learning — ijtimoiy xizmat orqali oʻqitish qisqa muddatli kurslari boshlanadi.

2027-yil 1-yanvardan tajriba tariqasida, «Inson» ijtimoiy xizmatlar markazlariga ijtimoiy xodim sifatida ishga qabul qilishda boshqa talabgorlar bilan malaka koʻrsatkichlari teng boʻlgan hollarda volontyorlik tajribasiga ega nomzodlarga ustunlik berish joriy etiladi. Bundan tashqari, farmonda 5-dekabr — Xalqaro volontyorlar kunini keng nishonlash hamda xalqaro tashkilotlar va xorijiy davlatlar vakillari ishtirokida muntazam ravishda Osiyo volontyorlar forumini oʻtkazish koʻzda tutilgan.