Toshkentdagi Milliy kutubxona ortidagi 1,3 gektar maydon obodonlashtiriladi

Loyiha Yunusobod tumanining “Qashqar” mahallasidagi Istiqlol koʻchasida joylashgan 1,3 gektar (13 ming kvadrat metr) maydonda amalga oshirilishi rejalashtirilgan. 10 yil muddatga bitim tuzish huquqi boshlangʻich narxi 514,2 mln soʻm bilan elektron auksionga chiqariladi. Investor kamida 10 mlrd soʻm sarmoya kiritishi va loyihani uch oy ichida ishga tushirishi shart.

DXSh shartlariga koʻra, kapital qurilish qilish va oʻsib turgan daraxtlarni kesish taqiqlanadi. Loyihada mingdan ortiq daraxt va butalar ekish, uzunligi 720 metr boʻlgan yangi piyodalar yoʻlagi qurish, piyodalar va velosiped yoʻlaklari yotqizish, dam olish zonalari, sport va bolalar maydonchalari, shuningdek, yengil konstruksiyali ovqatlanish shoxobchalarini tashkil etish koʻzda tutilgan. Bundan tashqari, xususiy sherik tashrif buyuruvchilarni tashish uchun kamida ikkita baggi yoki golf-kar turidagi elektromobil taqdim etishi kerak.

Avtoturargoh tizimi boʻsh joylar haqidagi maʼlumotlar aks etuvchi tablo bilan jihozlanadi va “Pullik toʻxtash joyi” axborot tizimiga integratsiya qilinadi. Tariflar shahar maʼmuriyati bilan kelishiladi. Rasmiylar talabiga koʻra, mazkur hududdan yiliga 60 kungacha shahar bayramlari va festivallari uchun foydalanilishi mumkin.