Oʻzbekistonda texnogen favqulodda vaziyatlardan jabrlanganlarga toʻlanadigan tovon puli tasdiqlandi

Toʻlovlar miqdori bazaviy hisoblash miqdoriga bogʻlangan. Halok boʻlgan shaxsning oilasiga BHMning 500 baravarigacha mablagʻ koʻzda tutilgan boʻlib, pullar turmush oʻrtogʻi, farzandlari, ota-onasi va qaramogʻidagilar oʻrtasida teng taqsimlanadi. Ogʻir tan jarohati uchun BHMning 200 baravarigacha, oʻrtacha ogʻirlikdagi jarohat uchun BHMning 150 baravarigacha (66 mln soʻm), yengil jarohat uchun esa BHMning 100 baravarigacha (44 mln soʻm) toʻlanadi. Aniq miqdorni komissiya hududiy iqtisodiyot va moliya organlari bilan kelishgan holda belgilaydi. Puldan tashqari, fuqarolarga vaqtinchalik uy-joy berilishi yoki ijara haqi toʻlab berilishi, taʼmirlash va qurilish materiallari bilan yordam koʻrsatilishi, ayrim hollarda esa 0,04 gektargacha yer ajratilishi mumkin.

Toʻlovlar tuman va shahar hokimliklari huzurida tashkil etiladigan qoplash jamgʻarmalaridan ajratiladi. Ular mahalliy byudjetlar, zaxiralar hamda boshqa qonuniy manbalar hisobidan toʻldiriladi; hujjatda respublika byudjetidan alohida mablagʻ ajratilishi koʻzda tutilmagan. Agar shaxs yoki uning mol-mulki sugʻurtalangan boʻlsa, toʻlovni sugʻurta kompaniyasi amalga oshiradi. Boshqa hollarda zararni aybdor tomon yoki jamgʻarma qoplaydi, bunda mablagʻ sud aybdorni aniqlaguniga qadar toʻlab berilib, keyinchalik undan undirib olinishi mumkin.

Ariza FV sodir boʻlgan kundan boshlab 30 kun ichida topshirilishi kerak. Komissiya uni oʻn kun ichida koʻrib chiqadi, toʻlov esa qaror qabul qilinganidan keyin 30 kun ichida amalga oshiriladi. Tovon puli olish huquqiga chet el fuqarolari va fuqaroligi boʻlmagan shaxslar ham ega. Oʻzboshimchalik bilan va roʻyxatdan oʻtkazilmasdan qurilgan imoratlarga yetkazilgan zarar qoplanmaydi. Tartib faqat jismoniy shaxslarga tegishli: yuridik shaxslar uchun qaror loyihasini FVV uch oy muddatda tayyorlashi lozim.