Toshkentda Jahon banki bilan birgalikda muammoli uylarda energoaudit oʻtkaziladi

Oʻtgan isitish mavsumida harorat meʼyoriy talablarga yetmagan binolar tekshiruvdan oʻtkaziladi. Obʼyektlar roʻyxati shahar hokimining uy-joy kommunal xoʻjaligi boʻyicha oʻrinbosari kuratorligida oʻtkazilgan manzilli oʻrganish natijalariga koʻra shakllantirildi, biroq shahar maʼmuriyati uylarning aniq roʻyxati va sonini hozircha eʼlon qilmadi.

Xorijiy ekspertlar instrumental oʻlchovlarni amalga oshiradi hamda tashqi devorlar, tomlar, yertoʻlalar, deraza va eshiklar, shuningdek, ichki isitish kommunikatsiyalarining texnik holatini baholaydi. Har bir muayyan holatda issiqlik yoʻqotilishining asosiy manbalari aniqlanadi va ularni bartaraf etish boʻyicha texnik choralar taklif etiladi.

Yigʻilgan maʼlumotlar poytaxtdagi koʻp qavatli uylarni samarali issiqlik bilan taʼminlash metodologiyasini yaratish uchun asos boʻlib xizmat qiladi. Hokimlik yagona mezonlar yordamida birinchi navbatda modernizatsiya qilinishi zarur boʻlgan obʼyektlarni aniqlash hamda tabiiy gaz va elektr energiyasi sarfini kamaytirish boʻyicha yechimlarni joriy etishni rejalashtirmoqda.