Mirziyoyevga 2030-yilga borib uran ishlab chiqarishni ikki baravar oshirish rejasi taqdim etildi

Hozirda «Navoiyuran» 2026-yilda 7,5 ming tonna uran ishlab chiqarishni maqsad qilgan, qidirib topilgan zaxiralarni 200 ming tonnagacha yetkazish koʻzda tutilgan. Joriy yilda korxona geologiya-qidiruv va texnologik burgʻilash ishlarini kengaytirish, qoʻshimcha sorbsiya qurilmalarini ishga tushirish hamda 250 ta ish oʻrni yaratish niyatida. Prezident sulfat kislotasi sarfini kamaytiradigan texnologiyalarni yanada faol joriy etishni topshirdi: 2030-yilga kelib uning oʻrnini bosuvchi reagentlar ulushi 40 foizga yetishi kerak.

Oʻzbekiston texnologik metallar kombinatida hozirda besh turdagi mahsulot oʻzlashtirilgan: reniy, volfram, molibden, selen va tellur. Prezident yana 11 turdagi, jumladan mis, nikel, kobalt, grafit, platina, vanadiy, marganets, qalay, surma va simob ishlab chiqarishni yoʻlga qoʻyishni topshirdi. 2026-yil oxiriga qadar kombinatda 12 ta investitsiya loyihasini ishga tushirish va yuqori tozalikdagi selen hamda tellur ishlab chiqarishni kengaytirish rejalashtirilgan.

Volframni chuqur qayta ishlashga 1,1 milliard dollar investitsiya jalb etish, bu orqali 2030-yilga borib ishlab chiqarish hajmini deyarli 2,2 milliard dollarga yetkazish koʻzda tutilmoqda. Taqdimotda keltirilgan maʼlumotlarga koʻra, kritik minerallarga jahon boʻyicha talab yiliga qariyb 10 foizga, anʼanaviy metallarga esa qariyb 1 foizga oshib bormoqda.

2030-yilga borib uran qazib olishni 15 ming tonnaga yetkazish vazifasi mart oyidayoq qoʻyilgan edi. Gazeta.uz eslatishicha, iyun oyida 2026–2030-yillarda kritik minerallar sohasida umumiy qiymati 4,2 milliard dollarlik 120 ta loyihani amalga oshirish niyati haqida xabar berilgan edi.