Qashqadaryoda A-380 trassasining 100 kilometrini 350 million dollarga rekonstruksiya qilish rejalashtirilmoqda

Yoʻlni Osiyo taraqqiyot banki (OTB) ishtirokida rekonstruksiya qilish rejalashtirilgan. Qarshi aylanma yoʻli 5,5 kilometrga uzaytiriladi va magistralga ulanadi. Masʼul idoralarga texnik-iqtisodiy asosnomani 2026-yil oxirigacha tayyorlash, qurilishni esa 2027-yil yanvarida boshlash topshirildi. Poezdlar oʻtayotganda tirbandliklar yuzaga keladigan “Qarshi — Pomuq” va “Gʻuzor — Beyneu” yoʻllaridagi kesishmalarda umumiy qiymati 250 milliard soʻm boʻlgan ikkita yoʻl oʻtkazgich quriladi.

Gazeta.uz OTB hujjatlariga tayanib aniqlashicha, gap Gʻuzor — Muborak uchastkasi haqida ketmoqda: bank taxminan 105,4 kilometrni, jumladan Qarshi aylanma yoʻlining 5,4 kilometrini modernizatsiya qilishni, yoʻlni toʻrt tasmali tsement-beton qoplamali qilib oʻzgartirishni koʻzda tutmoqda. Bank saytida loyiha hozircha moliyalashtirish uchun taklif qilinayotgan sifatida koʻrsatilgan, kreditning dastlabki hajmi — 359,4 million dollar, kartochkada tasdiqlash toʻgʻrisida qaror mavjud emas.

Suv taʼminoti boʻyicha 2026-yilda ajratilgan 1 trillion soʻm hisobidan ikki oy ichida 747 kilometr suv quvuri va kanalizatsiya tarmoqlari hamda 43 ta obyektni qurib bitkazish topshirildi, bu 200 ming aholini toza suv bilan taʼminlashi kerak. Hisorak suv omboridan suv quvurini boshlash uchun 100 milliard soʻm ajratildi, yana 210 million dollar jalb qilish topshirildi; loyiha 350 ming kishiga moʻljallangan. Beshta tumanning 700 ming aholisi uchun “Talimarjon — Muborak” tizimini rekonstruksiya qilishning TIA 2027-yil 1-aprelgacha tayyor boʻlishi kerak, loyihaga 150 million dollar jalb qilish rejalashtirilmoqda.