Hisobvaraqlar bloklanishiga biznesning eʼtirozlarini sud koʻrib chiqadi

OʻRQ-1183-sonli qonun Soliq kodeksining 111 va 112-moddalariga, shuningdek Iqtisodiy protsessual kodeksga oʻzgartishlar kiritadi. Operatsiyalarni toʻxtatib turish toʻgʻrisidagi qarorni soliq organi rahbari yoki uning oʻrinbosari qabul qiladi. Agar soliq toʻlovchi yoki soliq agenti bu qarorga rozi boʻlmasa, soliq organi eʼtirozni olganidan keyin uch kundan kechiktirmay iqtisodiy ishlar boʻyicha sudga ariza bilan murojaat qilishi shart. Sud qarori qabul qilinguniga qadar hisobvaraqlar boʻyicha operatsiyalar toʻxtatib turilgan holda qoladi.

Arizaga soliq organi bloklashga asos boʻlgan qoidabuzarlik dalillarini, soliq toʻlovchiga xabarnoma yuborilganligi tasdigʻini va uning eʼtirozini ilova qilishi lozim.

Agar sud toʻxtatib turishni rad etsa, cheklov mazkur qaror qonuniy kuchga kirgan kundan boshlab bekor qilinadi. Shuningdek, soliq toʻlovchi asos boʻlgan holatlarni bartaraf etganda ham soliq organi oʻz qarorini bekor qiladi. Ular orasida — belgilangan muddatdan keyin 10 kun ichida moliyaviy yoki soliq hisobotini taqdim etmaslik, kameral tekshiruv yakunlari boʻyicha soliq organining soʻroviga binoan tushuntirishlar yoki tuzatishlarni taqdim etmaslik, tekshiruvchilarni hududga yoki binolarga kiritmaslik va soliq toʻlovchining koʻrsatilgan manzilda yoʻqligi kabi holatlar mavjud.

Ilgari soliq organlari rahbarlari va ularning oʻrinbosarlari operatsiyalarni 10 kungacha boʻlgan muddatga toʻxtatib turishi mumkin edi, uzoqroq muddatga bloklash masalasini esa sud soliq organining iltimosnomasiga koʻra hal qilardi. Qonunchilik palatasi hujjatni aprel oyida uchta oʻqishda qabul qilgan, Senat esa uni avgustda maʼqullagan edi. Qonun rasmiy eʼlon qilingan kundan eʼtiboran kuchga kiradi.