Rubio Oʻzbekistonda AQSHning kichik reaktorlari joriy etilishi haqida maʼlum qildi

«Biz Amerikaning kichik modulli reaktorlarini joriy etmoqdamiz hamda Oʻzbekistonning elektr tarmoqlari va gaz taqsimlash tizimini modernizatsiya qilmoqdamiz, bu orqali hukumatga energiyaga tez oʻsib borayotgan talabni qondirishda yordam bermoqdamiz», — dedi Rubio. U aynan qaysi loyihalar nazarda tutilayotgani, ularda AQSHning qaysi kompaniyalari ishtirok etishi mumkinligi va muzokaralar qaysi bosqichdaligiga aniqlik kiritmadi.

2025-yil noyabr oyida «Oʻzatom» agentligi direktori Azim Axmedxadjayev Gazeta.uzʼga Oʻzbekiston ushbu sohadagi Amerika ishlanmalarini oʻrganishga tayyorligini maʼlum qilgan va Holtec, GE Hitachi hamda NuScale sertifikatlangan loyihalarini tilga olgan edi. Oʻshanda, 7-noyabr kuni, AQSH Davlat departamenti Mirziyoyev va Donald Trampning Vashingtondagi muzokaralari yakunlari qatorida Oʻzbekistonning Amerika kompaniyalaridan bunday reaktorlarni sotib olish majburiyatini koʻrsatgan edi. «Oʻzatom» matbuot xizmati mamlakatda bunday majburiyat yoʻqligini maʼlum qilgan.

Boshqa yoʻnalishlar qatorida Rubio Kolorado konchilik maktabi ishtirokida oʻta muhim minerallarni qazib olish va qayta ishlash, Dallasdagi Texas universitetining Samarqand kvant markazi bilan hamkorligi hamda IT Park dasturchilarining AQSH chiplari va SI modellariga kirish imkoniyatini sanab oʻtdi. Uning soʻzlariga koʻra, Boeing va GE Aerospace Oʻzbekiston yoʻlovchi samolyotlarini dvigatellar va butlovchi qismlar bilan taʼminlamoqda hamda mutaxassislarni tayyorlamoqda. Davlat kotibi, shuningdek, AKFA Group Bouling-Grinda (Kentukki shtati) ishlab chiqarishga 80 mln dollar sarmoya kiritishini bildirib, buni Oʻzbekistonning AQSHdagi ilk ishlab chiqarishi deb atadi.