Markaziy bank 2026-yilning ikkinchi choragi uchun uy-joy bozori sharhini e’lon qildi

Regulyator ma’lumotlariga koʻra, aprel—iyun oylarida bitimlar soni oʻtgan yilning mos davriga nisbatan 0,1 foizga oshgan. Bunga birinchi chorakdagi faollikning keskin oʻsishi turtki boʻlgan edi, oʻshanda 110 mingtaga yaqin shartnoma tuzilgan: xaridorlarning bir qismi xaridlarni eskrou tizimi joriy etilishidan oldin rasmiylashtirishga harakat qilgan. Hududlar kesimida bitimlar sonining eng katta oʻsishi Xorazm viloyatida — 17,8 foizga qayd etildi, Navoiy va Sirdaryo viloyatlarida koʻrsatkich qariyb 7,5 foizga, Qoraqalpogʻistonda — 6,1 foizga, Toshkentda esa 2 foizga oʻsdi.

Markaziy bank talabni qoʻllab-quvvatlagan asosiy omillardan biri sifatida ipotekani keltirdi: chorak davomida banklar tomonidan 7,4 trln soʻmlik uy-joy kreditlari ajratildi, bu bir yil oldingi natijadan 48 foizga koʻpdir. Butun birinchi yarim yillikda ipoteka kreditlash hajmi 13,1 trln soʻmga yetdi (38 foizlik oʻsish).

2026-yilning iyun oyida birlamchi bozordagi xonadonlar oʻtgan yilning iyuniga nisbatan soʻmda 6,2 foizga, dollarda esa 12 foizga qimmatlashdi. Ikkilamchi bozorda yillik oʻsish soʻmda 6,3 foizni, dollarda esa 12,2 foizni tashkil etdi. Markaziy bank Toshkentdan tashqarida narxlar poytaxtga qaraganda tezroq oʻsganini qayd etdi, bu boshlangʻich bazaning pastligi va investitsiyalarning kengayishi bilan izohlanadi. Shu bilan birga, Toshkentda bir sotix yerning oʻrtacha taklif narxi iyun oyida 292 mln soʻmgacha — yillik hisobda 9 foizga pasaydi.