Qoraqalpogʻistonda oltin qazib olish va qayta ishlash klasteri tashkil etiladi

Davlat rahbari geologiya-qidiruv ishlari mintaqa hududining atigi 20 foizini qamrab olganini, shu sababli yirik investorlarning qiziqishi ortib borayotgan bir paytda xomashyo zaxiralari toʻgʻrisidagi maʼlumotlar yetarli emasligini taʼkidladi. U Qoraoʻzak tumanidagi "Urusoy" konida xitoylik investorning loyihasini misol qilib keltirdi. 33 million dollar va texnologiyalarni kiritgan kompaniya 200 gektarlik maydonda 4 tonna hajmdagi oltin zaxirasini aniqladi hamda 320 kishini ish bilan taʼminladi.

Prezident masʼul shaxslarga bir oy muddatda investorlar tomonidan koʻtarilgan masalalarni hal etish, klaster tashkil qilish, geologiya-qidiruv ishlarining kompleks dasturini tayyorlash va mintaqa konlari zaxiralarini qayta baholash topshirigʻini berdi.

Bundan tashqari, yigʻilishda xomashyoni chuqur qayta ishlash masalasi muhokama qilindi. Hukumat hisob-kitoblariga koʻra, Boʻzatov tumanidagi "Kushkanatov" konida mirabilitni qayta ishlash yiliga 45 ming tonnagacha natriy sulfat ishlab chiqarish, astraxanitni qayta ishlash esa magniy sulfat olish imkonini beradi. Shuningdek, Germaniya kompaniyasining Beruniy tumanidagi kvartsit konini oʻzlashtirish boʻyicha 30 million dollarlik investitsiya loyihasi orqali yiliga 25 million dollarlik eksport bilan kristall kremniy ishlab chiqarish rejalashtirilgani maʼlum qilindi. Kimyo sanoati masʼullariga ilgari belgilangan 400 million dollarlik loyihalarga qoʻshimcha ravishda 200 million dollarlik yangi tashabbuslarni kiritish va 5000 ta ish oʻrni yaratish topshirildi.