Fargʻona viloyatidagi sud 105 nafar bolaning zaharlanishi boʻyicha hukm chiqardi

Sud kompaniya rahbariga 3 yil 6 oy muddatga ozodlikni cheklash jazosi tayinladi; qamoqda saqlangan vaqt hisobga olingach, yakuniy muddat 3 yil-u 9 kunni tashkil etdi. U sanitariya qonunchiligini buzish, oʻgʻrilik, oʻzlashtirish yoki rastrata yoʻli bilan talon-toroj qilish hamda hujjatlarni qalbakilashtirishda aybdor deb topildi. Texnolog sanitariya qonunchiligini buzgani uchun sudlandi: 3 yil ozodlikni cheklash jazosi tayinlandi, qamoqda saqlangan vaqt hisobga olinib, muddat 2 yil 6 oy-u 9 kun etib belgilandi. Sud tomonidan talon-toroj qilish va hujjatlarni qalbakilashtirishda aybdor deb topilgan sobiq direktor va bosh buxgalterga 3 yildan axloq tuzatish ishlari jazosi tayinlandi, ularning ish haqidan 20 foizi davlat daromadiga ushlab qolinadi. Podrobno.uz maʼlumotlariga koʻra, hukm 21-sentabr kuni chiqarilgan.

Hukmga binoan, 2026-yil 20-fevral kuni Fargʻona, Margʻilon, Quvasoy shaharlari hamda Quva va Fargʻona tumanlaridagi 238 ta davlat bolalar bogʻchasiga xizmat koʻrsatuvchi kompaniya Fargʻonadagi bogʻchalarga goʻshtli taom yetkazib bergan. Shundan soʻng 15 ta muassasadagi 105 nafar bolada zaharlanish belgilari paydo boʻlgan. Oziq-ovqat namunalarida Salmonella enteritidis va Staphylococcus aureus aniqlangan, ekspertiza esa bolalarning kasallanishi kompaniya mahsuloti bilan bogʻliq ekanini tasdiqlagan.

Sud moliyaviy holatlarni ham koʻrib chiqdi. Ish materiallariga koʻra, kunlik taomnoma varaqalarida tarbiyalanuvchilar soni oshirib koʻrsatilgan va toʻlov uchun soxta hisobotlar taqdim etilgan — shu tariqa 330,8 mln soʻm oʻzlashtirilgan. Yana 171,1 mln soʻm Quvasoydagi 22 ta bogʻchaning taomnomasiga qoʻshib yozish bilan, 53,4 mln soʻm esa yaroqsiz deb qaytarilgan mahsulotlar uchun toʻlov bilan bogʻliq boʻlgan. Quvasoydagi bolalar bogʻchasining elektr tarmoqlariga noqonuniy ulanishidan yetkazilgan zarar 105,89 mln soʻmga baholangan. Sud byudjetga 1,1139 mlrd soʻm va elektr energiyasi uchun alohida 105,89 mln soʻm undirish toʻgʻrisida qaror chiqardi.