Oʻzbekistonda shilqimlik uchun jarima BHMning 15 baravarigacha oshirildi

Moddaning yangi tahririga koʻra, insonning shaʼni va qadr-qimmatini kamsituvchi, jinsiy tusga ega boʻlgan bir martalik qoʻpol yoki bir necha bor sodir etilgan nomaqbul harakatlar uchun bazaviy hisoblash miqdorining 10 baravaridan 15 baravarigacha miqdorda jarima yoki 10 sutkagacha muddatga maʼmuriy qamoq jazosi qoʻllanilishi mumkin. Qonun bunday harakatlar qatoriga, xususan, tashqi koʻrinish yoki qaddi-qomatni tasvirlash, imo-ishoralar qilish, teginish va jinsiy tusdagi chaqiriqlarni kiritadi. Oʻzgarishlarga qadar ushbu huquqbuzarlik uchun BHMning 2 baravaridan 5 baravarigacha jarima yoki 5 sutkagacha qamoq jazosi berilar edi.

Maʼmuriy jazo qoʻllanilganidan keyin bir yil davomida takroran sodir etilgan huquqbuzarlik uchun sanksiyalar ham kuchaytirildi: jarima endilikda avvalgi 5–7 BHM oʻrniga BHMning 15 baravaridan 20 baravarigacha miqdorni tashkil etadi. Jarima oʻrniga 15 sutkagacha muddatga maʼmuriy qamoq tayinlash imkoniyati saqlab qolindi.

Oʻzgarishlar bolalarni zoʻravonlikning barcha shakllaridan himoya qilish tizimini takomillashtirishga oid qonundan oʻrin oldi. Bundan tashqari, hujjat bolalarga qarshi sodir etiladigan yana qator huquqbuzarliklar uchun javobgarlikni kuchaytiradi va voyaga yetmaganlar uchun qoʻshimcha huquqiy kafolatlarni joriy etadi.

2026-yil 1-sentabrdan boshlab Oʻzbekistonda bazaviy hisoblash miqdori 440 000 soʻmga teng.