MIB: 2026-yil boshidan buyon ijro ishlari boʻyicha 54,8 trln soʻm undirildi

Mablagʻning asosiy qismi, yaʼni 36,7 trln soʻmi davlat foydasiga yoʻnaltirildi. Tadbirkorlar va boshqa subyektlarga 16,5 trln soʻm, fuqarolarga esa 1,6 trln soʻmdan ortiq mablagʻ undirib berildi. Byuro maʼlumotlariga koʻra, yana 2,2 trln soʻmni davlat majburlov choralarisiz undirishga erishildi.

Ushbu davrda 3 trln soʻmlik aliment mablagʻlari undirildi. «Aliment toʻlovlari» jamgʻarmasidan 565 nafar fuqaroga 30,5 mlrd soʻm toʻlab berildi. Virtual va Xalq qabulxonalariga aliment masalalari boʻyicha 49,6 mingta murojaat kelib tushgan boʻlib, ulardan 32,6 mingtasi hal etildi. Bundan tashqari, noqonuniy ishdan boʻshatilgan 508 nafar shaxs ishiga tiklanib, ular foydasiga 21,6 mlrd soʻmlik ish haqi qarzdorligi undirildi.

Idora taʼkidlashicha, ijtimoiy ishlar doirasida 21 mingdan ortiq kishi ishga joylashtirildi va 11,2 mingdan ziyod oila yarashtirildi. Ijtimoiy «daftarlar» bilan bogʻliq jamgʻarmalarga 1,3 trln soʻm oʻtkazildi, bu oʻtgan yilgi koʻrsatkichdan 222 mlrd soʻmga koʻpdir.

36 turdagi ijro harakatlaridan 22 tasi endilikda avtomatlashtirilgan tarzda amalga oshirilmoqda. Qarzdorlarga 79,3 mln ta SMS-xabarnoma va 2,4 mln ta avtomatik qoʻngʻiroqlar yuborildi. Byuro maʼlumotlariga koʻra, shunday xabarnomalardan soʻng 1,2 mln ta ijro ishi ixtiyoriy muddatda yakunlandi.