Navoiyda xususiy bogʻcha tarbiyachisi bolalarni qiynagani uchun sudlandi

OAV tanishib chiqqan sud materiallaridan maʼlum boʻlishicha, ayol 2025-yil dekabridan 2026-yil apreligacha Amin kids xususiy bolalar bogʻchasida bir yoshdan uch yoshgacha boʻlgan bolalar bilan ishlagan. Sud uning bolalarga nisbatan muntazam ravishda jismoniy zoʻravonlik qoʻllaganini, oqibatda ular yengil tan jarohatlari olganini aniqladi. Kuch ishlatilgani holatini 7-aprel kuni tarbiyachi yordamchisi videoga olgan.

Psixologik ekspertiza jabrlangan bolalarda tarbiyachining fotosuratini koʻrganlarida shikastlanish holati, qoʻrquv hamda boshdan kechirilgan jismoniy va ruhiy zoʻravonlik alomatlari borligini tasdiqladi.

Sud majlisi davomida sudlanuvchi aybini qisman tan olib, kuch ishlatish holatlarini tasdiqladi, biroq bu muntazam boʻlmaganini aytib, oʻz holatini oilaviy stress bilan izohladi. Jinoyat ishlari boʻyicha Navoiy shahar sudi uni Oʻzbekiston Jinoyat kodeksining 110-moddasi ("Qiynash") boʻyicha aybdor deb topdi, 3 yilu 3 oy muddatga ozodlikdan mahrum qilish jazosini tayinladi va ikki yil davomida maktabgacha taʼlim muassasalarida tarbiyachi boʻlib ishlashni taqiqladi. Amin kids bolalar bogʻchasi faoliyati vaqtincha toʻxtatildi.