IIV va Iqtisodiyot va moliya vazirligi mahkumlarning uchrashuvlari tariflarini muhokamaga qoʻydi

Loyihaga koʻra, uzoq muddatli uchrashuv xonasi narxi oʻrinlar soniga bogʻliq boʻladi va toʻlov kunidagi bazaviy hisoblash miqdori (BHM) asosida hisoblanadi. Ikki oʻrinli xonada bir sutka BHMning 20 foizini, uch oʻrinlida — 25 foizini, toʻrt oʻrinlida esa 30 foizini tashkil etadi. Agar xonadan bir sutkadan kamroq foydalanilsa ham, toʻlov toʻliq bir sutka uchun undiriladi.

Videouchrashuvning bir daqiqasini BHMning 0,5 foizi, telefon soʻzlashuvining bir daqiqasini esa BHMning 0,1 foizi miqdorida belgilash taklif etilmoqda. Vaqtni «Qalʼa» markazlashtirilgan axborot tizimi hisoblab boradi, toʻliq boʻlmagan daqiqa uchun mutanosib ravishda haq olinadi. Mablagʻlar mahkumning shaxsiy hisobvaragʻidan yechib olinadi, mablagʻ yetarli boʻlmagan taqdirda esa aloqa qoldiq doirasida taqdim etiladi. Xona uchun toʻlov oldindan va faqat naqd pulsiz shaklda amalga oshirilishi kerak; muassasalar xodimlariga naqd pul olish taqiqlanadi.

Uzoq muddatli uchrashuvlar uchun toʻlovdan mahkumlarning oʻzlari, 16 yoshgacha (16 yosh ham kiradi) boʻlgan bolalar (agar ular bilan boshqa kattalar kelmagan boʻlsa), I guruh nogironligi boʻlgan shaxslar hamda Ijtimoiy reyestrdagi oilalarning aʼzolari ozod etiladi. Imtiyozlar videouchrashuvlar va qoʻngʻiroqlarga tatbiq etilmaydi. Agar xizmat foydalanuvchiga bogʻliq boʻlmagan sabablarga koʻra, masalan, uskuna yoki aloqa uzilishi tufayli koʻrsatilmagan boʻlsa, xizmat koʻrsatilmagan qism uchun toʻlov olinmaydi.

Alohida qayd etilishicha, Oliy Majlis Qonunchilik palatasi maʼlumotlariga koʻra, 6-noyabr kuni sohaviy qoʻmita yigʻilishida 2026-yil boshidan buyon jazoni ijro etish muassasalarida 64 mingdan ortiq uzoq muddatli va 30 mingdan ortiq qisqa muddatli uchrashuvlar, shuningdek, 215 mingdan ziyod telefon soʻzlashuvlari boʻlib oʻtgani maʼlum qilingan.