Oʻzbekistonda maʼmuriy sudlar vakolatlarini kengaytirish taklif etildi

Taqdim etilgan tashabbuslarga koʻra, amaldagi bitta turdagi arizaning oʻrniga toʻrt xil daʼvo murojaatini joriy etish, shuningdek, arizalarni berish uchun belgilangan olti oylik muddatni qayta koʻrib chiqish rejalashtirilmoqda. Fuqarolarga davlat organi tomonidan qonunchilik buzilganini eʼtirof etish toʻgʻrisida vaqt cheklovisiz daʼvo arizasi bilan murojaat qilish imkoniyatini berish taklif qilinmoqda.

Bundan tashqari, fuqarolarga mahalliy davlat hokimiyati organlarining ularning huquqlarini buzuvchi hujjatlari ustidan toʻgʻridan-toʻgʻri sudga shikoyat qilishiga ruxsat berish koʻzda tutilgan. Shuningdek, maʼmuriy sudlarga mansabdor shaxslar tomonidan biznes va fuqarolarga nisbatan taʼsir choralarini qoʻllashda ixtiyoriy (diskretsion) vakolatlardan foydalanishning qonuniyligi va asosliligini tekshirish huquqini berish taklif etilmoqda.

Sud qarorlarini ijro etish qismida quyidagi chora nazarda tutilgan: agar mansabdor shaxs jarima qoʻllanilganidan keyin ham hukmni yana bajarmasa, sud prokurorga bildirishnoma yuboradi. Davlat rahbari taqdim etilgan tashabbuslarni qoʻllab-quvvatladi.

Hisobot maʼlumotlariga koʻra, 2017-yil 1-iyuldan buyon mamlakat maʼmuriy sudlari tomonidan 150 mingga yaqin ish koʻrib chiqilib, davlat organlarining 70 mingdan ortiq qarori bekor qilingan hamda 27 mingga yaqin xususiy ajrim chiqarilgan.