Yevropa Ittifoqi Alisher Usmonov va Mixail Fridmandan sanksiyalarni olib tashladi

YeI Kengashining 22-sentabrdagi qarori ittifoqning Rasmiy jurnalida eʼlon qilindi. Hujjatga koʻra, 3000 ga yaqin jismoniy va yuridik shaxslarga nisbatan shaxsiy sanksiyalar standart olti oy oʻrniga 2029-yil sentabrgacha uzaytirildi. Fridmanning «Alfa-grupp» boʻyicha sheriklari — Pyotr Aven, German Xan va Aleksey Kuzmichyovga qarshi cheklovlar oʻz kuchida qoldi.

Reuters diplomatik manbalari bergan maʼlumotlarga koʻra, bu qaror murosali kelishuvning bir qismi boʻldi. Usmonovning roʻyxatdan chiqarilishiga milliy xavfsizlik masalalarini vaj qilgan Fransiya va Slovakiya erishdi. Lyuksemburg esa biznesmen aktivlarining bloklanishi sababli mamlakat hukumatiga qarshi 16 milliard dollarlik daʼvo arizasi kiritgani fonida Fridmandan sanksiyalarni olib tashlashni taklif qildi. Latviya dastlab murosaga qarshi chiqqan edi, ammo yakunda ovoz berishda betaraf qoldi, bu esa zaruriy konsensus bilan hujjatni tasdiqlash imkonini berdi.

Financial Times yozganidek va Reuters manbalari xabar berganidek, Parijning pozitsiyasi Ozarbayjonda ushlab turilgan Fransiya fuqarolarini ozod qilish boʻyicha kelishuv bilan bogʻliq edi. Boku bu jarayonlarning oʻzaro bogʻliqligini rad etdi. 23-sentabr kuni ertalab Ozarbayjon Prezidenti Ilhom Aliyev 20 kishini, jumladan, mamlakatda hukm qilingan Fransiya fuqarosi Marten Rayanni afv etish toʻgʻrisidagi farmonni imzoladi.

YeI Usmonovga qarshi sanksiyalarni 2022-yilda kiritgan edi. Milyarder ularga Yevropa sudida eʼtiroz bildirgan, biroq daʼvo rad etilgandi. Biznesmen faqatgina mashhurligi va boyligi tufayli cheklovlarning nishoniga aylanganini taʼkidlagan edi.